Late 60 - Tedim Bible Revision 2017

Gal Lelhna ah Thumna le Huh ding Ngetna

¹ Pasian aw, kote na hong nil khia khin a, ka panmunte uh na sukham mangkhin hi. Kote tungah nangmah na heh khin hi. Kote ka ngei uh hong bangsakkik ta in.

² Nangmah in lei na liingsak khin a, lei na khangkhamsak khin hi. Kip lo ahih ciangin a kitam mate matkik in.

³ Nangmah in na mite a haksa na thuaksak khin hi. Ka dawn dingun ko a hong hoisak leenggahzu na hong pia khin hi.

⁴ Thalte panin kihemin a kikaihkhop nadingun nang hong zahtakte adingin dial khat na koih khin hi.

⁵ Nangma it mite a suahtak theih nadingin na khut taklam tawh gualzawhna pia inla, koteʼ ngetna hong pia in.

⁶ A biakinn sungah Pasian in thu gen a, “Gualzo a lungdamna tawh Shekhem gam khen khia-in Sukkoth gam kuam ka seh khia ding hi.

⁷ Gilead gam keima aʼ hi a, Manasseh gam zong keima-aʼ mah ahi hi. Efraim gam ka sik lukhu hi a, Judah gam ka ciangkhut ahi hi.

⁸ Moab gam ka kisilna kuang hi a, ka neihsa hi cih lahna limin Edom gam tungah ka khedap ka lawn a, Filistia gam tungah gualzawhna tawh ka awng hi,” a ci hi.

⁹ Kua in khuapi muanhuai ah kei hong paipih ding hiam? Kua in Edom gamah kei hong paipih ding hiam?

¹⁰ Pasian aw, nangmah in kote a hong don nawn lo khinta hi lo na hi hiam? Pasian aw, komauʼ galkapte tawh na hong kuan khia kei hi.

¹¹ Ka galdona uh ah huhna hong pia in; bang hang hiam cih leh mihingʼ huhna a mawkna hi.

¹² Pasian tawh khauh takin i hih ding hi. Amah pen i galte hong sikcipsak ding pa ahi hi.