Late 6 - Tedim Bible Revision 2017

Lungkham Ciangin Hehpih ding Ngetna

¹ Topa aw, na heh laitak hong taii kei inla, lung so sa-in hong thuhilh kei in.

² Topa aw, thaneem ka hih manin kei tungah dikna hong zang in. Topa aw, ka guh ka taang na mahmah ahih manin hong damsak in.

³ Ka hingim mahmah hi. Topa aw, bang tanvei nang hong zekai lai ding na hi hiam?

⁴ Topa aw, hong kihei inla, kei hong hon in. Itna kip a nei pa na hih manin keimah hong hon in.

⁵ Bang hang hiam cih leh misite omna gam sungah nangmah phawk theih nading bangmah om lo ahih manin, Leinuai panin kua in nang hong phat thei ding ahi hiam?

⁶ Ka tautauna-in ka gim hi. Zan sialin ka khitui in ka lupna tum a, ka kahkahna-in ka lupna kawt dikdek hi.

⁷ Dahna hangin ka mit mial a, ka galteʼ hong bawlna hangin ka mit zung zaw semsem hi.

⁸ Siatna a bawlte khempeuh aw, ka kiang panin kihem khia un; bang hang hiam cih leh Topa in ka kahna aw a za hi.

⁹ Topa in keima thumna hong za khinzo a, Topa in ka thungetna hong sang ta hi.

¹⁰ Ka galte khempeuh zahhuai mahmah in genthei ding uh hi. Amaute nungkikin maizumna thuak pah ding uh hi.