Late 57 - Tedim Bible Revision 2017

Pasianʼ Hut ding Lungmuangin Ngetna

¹ Kei hong hehpih in Pasian aw, nang hong bel ka hih manin kei hong hehpih in. Siatna huihpi a ven mateng na kha liim ah kong bu ding hi.

² A Sangpen Pasianʼ tungah, keima deihna a hong tungsak Pasianʼ tungah ka ko hi.

³ Amah in vantung panin keimah hong dawngin hong hon khia dinga, amah in kei hong tuancilte maizumin a koih ding hi. Pasian in ama itna kip le a thumanna hong lak ding hi.

⁴ Huaihamna tawh mihing a ne tum, humpinelkai tawh a kibang miteʼ lakah ka om hithiat hi. Amauʼ hate, namsau hiam tawh kibang hi.

⁵ Pasian aw, vantungah na liatna kilangsak in. Leitung khempeuh ah na minthanna omsak in.

⁶ Amaute in keima khe, thang hong siah uh a, lungkhamin hong koih uh hi. Ka pai nading munah gum khat to uh a, ahih hangin tua gum sungah amaute mah kia uh hi.

⁷ Ka lungmuang hi, Pasian aw, ka lungmuang hi. La ka sa dinga, nakpi takin ka sa ding hi.

⁸ Ka tho ding hi. Harp lasakna le laiza lasakna aw, tho ta un. Zingsang khuavak hong phong ning.

⁹ Topa aw, mite lakah lungdam kong ko dinga, minamte lakah nangmah phatna ka sa ding hi.

¹⁰ Bang hang hiam cih leh na itna kip in vantung ban a, na thumanna in meiipi ban to hi.

¹¹ Pasian aw, vantungah na liatna kilangsak in. Leitung khempeuh ah na minthanna omsak in.