Late 56 - Tedim Bible Revision 2017

Muanna tawh Thungetna

¹ Pasian aw, mite in kei hong tuancil ahih manin kei hong hehpih in. Sun thapai-in galte in kei hong sucip hi.

² Sun thapai-in ka galte in kei hong tuancil uh a, kiphatsakna tawh mi tampi in kei hong do hi.

³ Kei ka lau ciangin nangmah kong muang hi.

⁴ A thu ka phat Pasianʼ sungah, lunghihmawhna khat zong nei het loin Pasian ka muang hi. Mihing ahi lelte in kei, bang hong cih zo ding ahi hiam?

⁵ Amaute in ka vai siatsak ding sun thapai-in hanciam uh a, amauʼ ngaihsutnate khempeuh keima siat nading ahi hi.

⁶ Amaute kikaikhawmin keimah hong buk uh a, ka gamtatna khempeuh hong encik uh hi. Amaute in keimah thah ding a hanciam uh bangin,

⁷ amauʼ khialhna hangin amaute thuk in. Pasian aw, hehna tawh tua mite lawn khia suk in.

⁸ Ka sin linnate khempeuh nangmah in na ciamteh khin hi. Ka khituite khempeuh na thawl sungah thun in. Tuate na laibu sungah kiciamteh hi lo ahi hiam?

⁹ Tua ciangin, keimah in kong koh ni peuh ciangin ka galte nungkik ding hi. Pasian pen keima-aʼ ahihna ka thei hi.

¹⁰ A thu ka phat Pasianʼ sungah, a thu ka phat Topaʼ sungah,

¹¹ lunghihmawhna khat zong nei het loin Pasian ka muang hi. Mihing lellelte in kei, bang hong cih zo ding ahi uh hiam?

¹² Pasian aw, nang tungah ka kiciamna ka zuih kul hi. Nangma tungah lungdamna kong thuk hi.

¹³ Bang hang hiam cih leh sihna panin nong hon khia khin hi. Pasianʼ mai, nuntakna khuavak sungah ka pai theih nadingin ka khe a taalna ding panin na hong hon khia hi.