Late 51 - Tedim Bible Revision 2017

Mawhmaina ding Ngetna

¹ Pasian aw, nangma itna kip om bangin kei hong hehpih inla, na hehpihna lian om bangin ka thu palsatnate hong phiatkhiatsak in.

² Ka khialhna panin hong silsiang kiuhkeuh inla, ka mawhna panin kei hong siangsak in.

³ Bang hang hiam cih leh ka thupalsatnate ka thei a, ka mawhnate khempeuh ka phawk ngitnget hi.

⁴ Nangma tungah khialin, nangma muhna ah a sia ka gamta khin hi. Tua ahih ciangin na thugenna ah nang na thutang a, thu na hong khenna ah pauna ding bangmah om lo hi.

⁵ A khial sa mahin kei ka suak a, ka nu in a gil sungah hong paii tung a kipan a mawh sa ka hi hi.

⁶ Nang in nuntakna sungah thumanna na deih hi. Tua ahih ciangin ka lungsim tawng ah ciimna hong hilh in.

⁷ Puknah tawh hong nul in; kei ka siang ding hi. Hong sil in; vuk sangin ka ngo zaw ding hi.

⁸ Lungdamna le kipahna kei tungah hong pia inla, na hong suk gawp mipa hong lungdamsak in.

⁹ Ka mawhna khempeuh na mai panin seel inla, ka khialhna khempeuh hong phiatkhiatsak in.

¹⁰ Pasian aw, keima sungah lungsim siangtho hong piangsak inla, a thak a man ngaihsutna ka sungah hong guan in.

¹¹ Nangma omna panin kei hong paai khia kei inla, keima kiang panin na kha siangtho la khia kei in.

¹² Nong hotkhiatna hangin hong lungdamsakkik inla, utna lungsim tawh keimah hong huh ta in.

¹³ Tua ciangin thupalsatte na zia na tong ka hilh dinga, nangma lamah mimawhte hong kiheikik ding uh hi.

¹⁴ Kei a hong hon Pasian aw, sih nading panin kei hong hon khia in. Nong hotkhiatna thu lungdam takin ka sa ding hi.

¹⁵ Topa aw, ka pau theih nadingin kei hong huh in; nangmah kong phat ding hi.

¹⁶ Bang hang hiam cih leh ganhing tawh biakna na deih kei hi. Meihal biakna hong pia hi taleng zong, na lungdam kei ding hi.

¹⁷ Pasianʼ san theih biakna pen lungsim kitamzan ahi hi. Pasian aw, a kitamzan, a kisik lungsim na simmawh kei ding hi.

¹⁸ Na lungkimna pha tawh Zion tungah a pha bawl inla, Jerusalem kulhpite ciangkik ta in.

¹⁹ Tua ciangin biakpiakna man, meihal biakna le meihal biakpiakna bupah na lungkim dinga, na biakna tau tungah bawngtalte hong kipia ding hi.