Late 50 - Tedim Bible Revision 2017

Pasian in Biakpiakna Sangin Gamtatna tawh Thu Khen zaw

¹ Vanglian, Topa Pasian hong pau khia a, nisuahna le nitumna kikal leitung mi khempeuh a khawm hi.

² Hoih kicinna Zion panin Pasian hong taang khia hi.

³ Eiteʼ Pasian hong pai a, amah dai om mawk lo hi. Ama mai ah mei husia om a, a kimkot ah huihpi om hi.

⁴ A mite tungah thu a khen theih nadingin tung lam vantung le leitung a sam hi.

⁵ “Biakpiakna tawh, kei tungah thuciamna a bawlte, ka mi citakte ka kiangah hong khawm un,” a ci hi.

⁶ Vantung in ama thumanna gen hi; bang hang hiam cih leh Pasian mahmah thukhen pa ahi hi.

⁷ “Ka mite aw, ngai un; thu kong gen ding hi. Israel-te aw, noteʼ lang khat ah teci ka pang ding hi. Kei pen Pasian ka hi a, nomauʼ Pasian ka hi hi.

⁸ Na biakpiakna uh ah note kong mawhsak kei hi. Na meihal biaknate uh ka mai ah om ngitnget hi.

⁹ Ahi zongin na inn pan uh a bawngtal hitaleh na ganbuk pan uh a keeltal hitaleh ka hong sang kei ding hi.

¹⁰ Bang hang hiam cih leh gamlak ganhingte khempeuh, mual tul tampite tunga a om ganhingte keima-aʼ ahi hi.

¹¹ Huih lak vasate khempeuh keimah in ka thei a, gamlak a gamta khempeuh keima-aʼ ahi hi.

¹² “Ka gil kial taleh zong note kiang panin an kong ngen kei ding hi; bang hang hiam cih leh leitung le a sunga om khempeuh keima-aʼ ahi hi.

¹³ Bawngtalteʼ sa ne dinga, keelteʼ sisan dawn ding ka hi hiam?

¹⁴ Lungdam biakpiakna Pasian tungah pia unla, Sangpen pa tungah na thuciamnate uh bawl un.

¹⁵ Haksat hun ciangin keima tungah hong ko un. Note kong hon khia dinga, note in keima min nong thangsak ding uh hi,” a ci hi.

¹⁶ Ahih hangin migilote tungah Pasian in thu gen a, “Ka thukhamte lawhna ding ka thuciamna na muk uh tawh gen nading thu nei na hi uh hiam?

¹⁷ Bang hang hiam cih leh hilh ding na ut kei uh a, ka thute na nung lam uh ah na paai uh hi.

¹⁸ Guta khat mu le-uhcin ama lawm na hi pah uh a, a paktat mite tawh na kikhawl uh hi.

¹⁹ “Na kam uh, siatna na uksak uh a, na leii un khemna a khangsak hi.

²⁰ Na sanggamte uh langpangin thu na gen uh a, amauteʼ mawhna na zong uh hi.

²¹ Hihte khempeuh na gamta khin uh a, bangmah ka pau kei hi. Kei pen no tawh a kibangin nong ngaihsun kha uh hi. Ahih hangin tu-in note ka hong taii a, na mawhna uh na mai uh ah ka koih hi.

²² “Tua ahih ciangin Pasian a mangngilh mite aw, hih thuciamteh un. Tua hikeileh note kong bal gawp ding hi. Note hong hon khia ding kuamah om lo hi.

²³ Biakpiak nadingin lungdam piakna hong paipih mi in kei a hong pahtawi ahi hi. Ka thu a mang mite khempeuh ka hon khia ding hi,” a ci hi.