Late 49 - Tedim Bible Revision 2017

Hauhna in Sihna Pengsak lo

¹ Hih thu za un, mi khempeuh aw! Ngai un, leitung a a teeng khempeuh,

² mi lian mi neu, mihau mizawngte aw!

³ Ka kam in pilna thu gen dinga, ka lungsim ngaihsutna kitel siang ding hi.

⁴ Paunak thu theih hak khat ka ngaihsun dinga, laiza lasakna tawh a khiatna ka gen tel ding hi.

⁵ Haksat hun, hong bawlsiateʼ gitlohna in hong nencip ciangin bang hangin lau ding ka hi hiam?

⁶ Mite in a hauhna uh muangin, tampi a neihna uh a kisaktheih pih hangun,

⁷ amah le amah a kitan khia tawm zo taktak, a nuntakna man ding Pasianʼ tungah a pia zo mi kuamah om lo hi.

^8-9 Bang hang hiam cih leh a nuntakna tat nading a man tam mahmah a, Leihawmpi mu ngei lo zah ding a hing tawntung dingin kitan khia zo ngei lo hi.

¹⁰ Amah in a pilte nangawn a si mu dinga, a haite le a tei lote a kibangin sia-in, amauʼ neihsa khempeuh midangteʼ tungah nusiat uh hi.

¹¹ Amaute in leitangte amauʼ min a puaksak uh hangin hankhuk pen khang tawntung amauʼ omna hi ngitnget ding hi.

¹² Ama hauhna ah mi kipsuak thei lo a, a si thei ganhingte tawh a kibang lel ahi hi.

¹³ Hih pen a kihai muanteʼ ngah hi a, amauʼ ngah sa tawh a lungkimteʼ thumong ahi hi.

¹⁴ Tua bangin amaute Leinuai-a dingin kiseh hi. Sihna pen amau a cing pa hi ding hi. Han khuk sungah amaute tuak suk suak ding uh a, a mel uh sia dinga, Leinuai, amauʼ inn hi ding hi.

¹⁵ Ahih hangin Pasian in Leinuaiʼ vangliatna panin kei hong hon khia ding hi; bang hang hiam cih leh amah in kei hong sang ding hi.

¹⁶ Mi khatpeuh a hauh ciang ahi a, a innkuan minthanna a khan ciang ahi zongin lau-in lunghihmawh dingin ngaihsun tuan kei in.

¹⁷ Bang hang hiam cih leh a sih ciangin bangmah keng lo dinga, a minthanna in amah zui suk lo ding hi.

¹⁸ A hin lai-in amah a lungdamin kingaihsunin, mi khat in ama ading na a lim sep ciangin phatna a ngah hangin,

¹⁹ khuavak a mu nawn lo dingin a si khin sa a pu a pate kiang mahah amah pai veve ding hi.

²⁰ Ama hauhna in mi hing paisuaksak thei lo a, a si thei ganhingte tawh a kibang lel ahi hi.