Late 47 - Tedim Bible Revision 2017

Pasian, Kumpi Ahihna ah Minamkimteʼ Lungdamna

¹ Mi khempeuh aw, na khut uh beeng un! Lungdamna la nakpi-in sa-in Pasian phat un.

² Bang hang hiam cih leh Topa, a Sangpen pa, dipkuathuai a, leitung khempeuh a uk kumpi lian khat ahi hi.

³ Mi khempeuh eima nuai ah, minamte i khe nuai ah amah in hong zawhsak hi.

⁴ Ama it Israel-teʼ angtan pih eima luah ding leitang amah in hong teelsak hi.

⁵ Awging tawh Pasian pai to a, peengkul aw tawh Topa pai to hi.

⁶ Pasian tungah phatna la sa un, phatna la sa un! I Kumpipa tungah phatna la sa un, phatna la sa un!

⁷ Bang hang hiam cih leh Pasian pen leitung khempeuhteʼ kumpi ahi hi. La sakna tawh amah phat un!

⁸ Pasian in minamte uk a, a tokhom siangtho tungah Pasian tu hi.

⁹ Uliante le Abrahamʼ Pasianʼ mite kipawl khawm uh hi. Bang hang hiam cih leh leitung miteʼ lumte khempeuh Pasian-aʼ suak khinta a, amah a sangpi-in kithangsak hi.