Late 46 - Tedim Bible Revision 2017

Pasian, Ama Miteʼ Belh

¹ Pasian, i belh leh i thahatna hi a, haksat hunin a hong huh pahpah pa ahi hi.

^2-3 Tua ahih ciangin, leitung kikhiinin, mualte tuipi sung a kidenna zongin, a tuite ging zuazua-in phuan zuazua a, hih ginna hangin mual liante a liing zongin, i lau kei ding hi.

⁴ Sangpen paʼ teenna khua siangtho, Pasianʼ khuapi, a lungdamsak gun khat a om hi.

⁵ Ama laizang ah Pasian om a, amah a kiliing kei ding hi. Pasian in phalvak tungin amah huh ding hi.

⁶ Minamte lungkham uh a, kumpi gamte kiliing hi. Ama aw ging khiasak a, leitung kicim gawp hi.

⁷ Vanglian Topa eite tawh hong om khawm a, Jakob Pasian eima belh ahi hi.

⁸ Hong pai unla, Topaʼ sepna hong mu un. Leitung khempeuh gam khing a suahsak khitna hong en un.

⁹ Amah in leimong dongah gal beisak hi. Amah in thalpi kuaitanin teipi susia a, leengte mei tawh a hal tum hi.

¹⁰ “Om hithiat unla, Pasian ka hihna thei un. Minamte lakah keimah hong kisangsak a, leitung khempeuh ah ka min hong kithangsak hi,” a ci hi.

¹¹ Vanglian Topa, eite tawh hong om khawm a, Jakobʼ Pasian, eima belh ahi hi.