Late 42 - Tedim Bible Revision 2017

BU NIHNA ( La 42—72 ) Sal a om hun le Lungkham hunin Pasian Lunggulhna

¹ Sakhi in tui luang sialsial a lunggulh bangin nang ka hong lunggulh hi, ka Pasian aw.

² A nungta Pasian kong deih hi. Cik ciangin kei hong pai-in Pasianʼ maitang hong mu thei ding ka hi hiam?

³ Mite in keima tungah, “Na Pasian koi ah om ahi hiam?” hong cihcih sungteng, sun le zanin ka khitui an-in ka ne hi.

⁴ Ka lungsim sung ka suah khia a, pawi bawl mihon khat kipakin otna le nuamna la tawh Pasianʼ inn ah ka makaihna, mihonpi tawh ka paina ka phawkkik hi.

⁵ Bang hangin kha kunkun a, lunghimawh niloh ka hi hiam? Pasianʼ sungah lametna nei ning; bang hang hiam cih leh kei a hong huh ka Pasian ka phatkik ngawn ding hi.

⁶ Ka lungsim tamkham ahih manin Jordan le Hermon gam, Mizar mual tung panin nang ka hong phawk hi.

⁷ Nangma tuizeu gingte khatlekhat kidawng uh a, dahna tuihualte in kei a hong tuum hi.

⁸ Topa in sun tawntungin a itna kip hong lak a, zan hun ciangin nuntakna a hong pia Pasianʼ tungah thungetna la ka sa hi.

⁹ “Bang hangin kei hong mangngilh na hi hiam? Galte in hong sukcip manin bang hangin kapin kidikdik ka hi hiam?” ci-in ka Pasian, kei a hong huhpaʼ tungah ka gen hi.

¹⁰ Ka langte in kei tungah, “Na Pasian koi ah om ahi hiam?” hong cihcih sungteng, ka sungah meima nai tawm bangin hong tum ngangngang hi.

¹¹ Bang hangin kha kunkun a, lunghimawh niloh ka hi hiam? Pasianʼ sungah lametna nei ning; bang hang hiam cih leh kei a hong huh ka Pasian ka phatkik ngawn ding hi.