Late 4 - Tedim Bible Revision 2017

Topa Muanga Nitak Thungetna

¹ A thuman ka Pasian aw, ka hong sap ciangin hong dawng in. Gimna ka thuak ciangin nopsakna nong pia hi. Kei hong hehpih inla, ka thungetna hong za in.

² Mite aw, ka minphatna in bang tanvei daina thuak ding ahi hiam? Bang tanvei thumawkna deihin zuau thu zong ding na hi uh hiam?

³ Ahih hangin Topa in ama adingin miphate a tuam koih lam thei ta un. Keʼn ka sap ciangin Topa in hong za hi.

⁴ Lau-in liing unla, mawhna peel un. Na lupna tung uh ah lungngai phapha unla, om khikhe un.

⁵ A man biakpiaknate lui unla, Topa muang un.

⁶ Mi tampi in, “Thupha tampi hong pia in. Ko tungah na maitang vang hong taangsak in, Topa!” ci uh hi.

⁷ Amaute, an le leengtui a hauh cianga a nuam uh sangin nuamna lian zaw ka lung sungah nong guan hi.

⁸ Nuam takin lumin ka ihmu ta ding hi; bang hang hiam cih leh Topa aw, nangmah bek in lungmuanna munah na hong omsak hi.