Late 39 - Tedim Bible Revision 2017

Nuntakna Kician lo, A Mawkna Ahihna

¹ “Ka leii tawh ka khialh loh nadingin ka gamtatna ka kikem dinga, ka omna ah migilote a om lai teng ka kam ka kham ding hi,” ka ci hi.

² Pau loin ka dai om a, ka dai omna a mawkna suak a, ka thuakna khang semsem hi.

³ Ka sungah ka lung so a, ka lungngaih ciangin ka lung so semsem hi. Tua ciangin ka pau khia a,

⁴ “Topa aw, ka mong le ka hun a kiseh zah hong theisak inla, ka nuntakna a beipak hun ding hong theisak in!” ka ci hi.

⁵ Ka nuntakna hun khutme tan bang bekin na bawl a, ka nuntakna hun nangma muhna ah bangmah gentham lo hi. Mihing khempeuh, husan bang bek hi takpi hi.

⁶ Niliim bangin mihing pai kawikawi takpi hi. A mawkna-in amau lungkham takpi uh a, kuaʼ ngah ding cih thei lopi-in mite in na a khol uh hi.

⁷ Tu-in Topa aw, keʼn, bang ngak lai ding ka hi hiam? Keima lametna nangma sung bekah om hi.

⁸ Ka thupalsatna khempeuh panin kei hong hon khia inla, miteʼ nuihsatin kei hong bawl kei in.

⁹ Hih bangin a hong bawl nangmah na hih manin pau loin ka om a, ka kam ka ka kei hi.

¹⁰ Nong vuakna ma ka tung panin la khia in. Na hong vuakna hangin ka tha bei ta hi.

¹¹ Mi khat a mawhna hangin tai-in na sat ciangin, nget in a nektum bangin ama na manpha na beisak hi. Mihing khempeuh husan khat bang bek hi takpi hi.

¹² Topa aw, ka thungetna hong ngai inla, ka kikona hong za in. Ka khitui luanna hong thudon in. Bang hang hiam cih leh ka pu ka pate khempeuh bangin kei zong na zin, na peemta ka hi hi.

¹³ Ka manthan hun matengin ka lungnop theih nadingin kei hong en in!