Late 37 - Tedim Bible Revision 2017

Topa in Amah a Muangte Kem: Migilote Sia ding

¹ Migiloteʼ hangin kilungsosak kei inla, a man loin a gamta mite en dingin ngaihsun kei in.

² Bang hang hiam cih leh lopa bangin amaute vul pak ding uh a, lokung hingte bangin keutum ding uh hi.

³ Topa muang inla, gamtat hoih in. Gam nuamah teeng inla, thumanin om in.

⁴ Topa sungah lungkim in; amah in na deihna hong pia ding hi.

⁵ Topa tungah na vai teng ap in. Amah muang in; amah in hong sem ding hi.

⁶ Amah in nangma dikna khuavak bangin, nangma thumanna nitaang bangin hong langsak ding hi.

⁷ Topaʼ mai ah khawl dide inla, lungduai takin ngak in. Ahihna a daupai pa tung le siatna a bawlpa tungah kilung so tawmsak keʼn!

⁸ Hehna panin kikham inla, sinsona nusia in. Nangmah kilung so tawmsak keʼn; tua in siatna bekah a hong paipih hi.

⁹ Bang hang hiam cih leh migilote kipuaseh dinga, ahih hangin Topa a ngakte in leitung luah ding uh hi.

¹⁰ Ahih hangin tawl khat sungin migilo pa om nawn lo dinga, ama omna mun na lim zon mahmah hangin tua lai ah amah na om lo ding hi.

¹¹ Ahih hangin lungnemte in leitung luahin, gen zawh lohin amaute nuamsa ding uh hi.

¹² Migilo in thuman pa sawm a, a ha a gawi san hi.

¹³ Ahih hangin Topa in migilo paʼ hun a tung ta ahih lam mu ahih manin amah a nuihsan lel hi.

¹⁴ Mizawngte le mi cimawhte a su niam ding, a thutangte a that dingin migilote in namsau dokin, a thal uh a keek hi.

¹⁵ A namsau uh amauʼ lungtang mahah tumin, a thalte uh kitan ding hi.

¹⁶ Migiloteʼ hauhna sangin thuman mite in tawmno khat bek a neihna hoih zaw lai hi.

¹⁷ Bang hang hiam cih leh migiloteʼ thahatna kipaih khiatsak dinga, ahih hangin Topa in mihoihte a huh hi.

¹⁸ Topa in a paubaang lote kem a, amauʼ gamh kip den ding hi.

¹⁹ Siatna hun ciangin amaute kimaizumsak lo a, kial hun ciangin tampi nei uh hi.

²⁰ Ahih hangin migilote kisia hi. Topaʼ galte pen lono etlawm tawh kibang a, amaute mangthang pak uh hi. Meikhu bangin mangthang uh hi.

²¹ Migilo in leitawi la a, lohkik zo nawn lo hi. Thuman mi ahihleh cingh-in mi a pia hi.

²² Bang hang hiam cih leh Topaʼ thupha piakte in leitung luah ding uh a, ahih hangin a samsiatte kipuaseh ding hi.

²³ Topa in mi a lam pai nading lak a, ama lungkim bangin a gamta pa amah in a kipsak hi.

²⁴ Amah a puk hangin lutuk lo ding hi. Bang hang hiam cih leh Topa in ama khut len hi.

²⁵ Thuman mi a kinusiacip, a suanlekhakte ngen tawmin a kivak, ka neu lai a kipanin tu-a ka teek hun ciang dong ka mu ngei nai kei hi.

²⁶ Amah in mi citpiak ngitngetin, mi tungah leitawi pia khia a, a suanlekhakte zong thupha ngah mi a suak hi.

²⁷ Siatna panin kikem inla, gamtat hoih in; tua hileh na khantawnin, na kip paisuak ding hi.

²⁸ Bang hang hiam cih leh Topa in thutang deih a, ama mi siangthote nusia lo ding hi. Thuman mite kikemcing den dinga, ahi zongin migiloʼ suanlekhakte kipuaseh ding hi.

²⁹ Thuman mi in leitung luah dinga, tua leitang tungah teeng paisuak ding hi.

³⁰ Thuman miʼ kam in pilna gen a, a leii in thutang gen hi.

³¹ A lungsim sungah ama Pasianʼ thukham om a, a gamtatna khempeuh ah lampial het lo hi.

³² Migilo in thuman mi encik a, thah dingin a zong hi.

³³ Topa in migilo paʼ khut sungah amah nusia lo dinga, thusit dingin a kipaipih ciangin mawhna thuaksak lo ding hi.

³⁴ Topa ngak inla, ama lampi zui in. Leitang a luah dingin nang hong liansak dinga, migiloteʼ siatna nangmah in na en ding hi.

³⁵ Lebanon taamtak sing bangin a sang pha mahmah migilo kiphasak khat keimah in ka mu hi.

³⁶ Ama kiangah ka paikik a, amah na om nawn lo hi. Amah ka zonzon hangin kimu zo nawn lo hi.

³⁷ Paubaang lo mi ciamteh inla, thutang mi en in; bang hang hiam cih leh gal a phuang lo mi adingin nopna a om hi.

³⁸ Ahih hangin thupalsatte kisusia mangkhin dinga, migiloteʼ suanlekhakte kipuaseh ding hi.

³⁹ Topa in thuman mite hon khia a, amah pen haksat hun ciangin amauteʼ bukna ahi hi.

⁴⁰ Amaute in Topa beel ahih manin amah in amaute huhin hon khia a, migiloteʼ kiang panin amaute honin suaktasak hi.