Late 33 - Tedim Bible Revision 2017

A Piangsak, A Kem, Pasian Phat Un

¹ No thuman mite aw, Topa tungah lungdam un! Pahtawina pen thutangte tawh kilawm kituak hi.

² Laiza khausai lasakna tawh Topa phat unla, harp zang sawm khausai lasakna tawh ama tungah la ngaih sa un.

³ Ama tungah la thak sa unla, a gingpha mahmah in hoihtakin khausai tum un.

⁴ Bang hang hiam cih leh Topa thutang a, ama hihna khempeuh thuman tawh a sem hi.

⁵ Amah in thuman le thutang deih a, leitungah Topaʼ itna kip a kidim hi.

⁶ Topaʼ kampauna tawh vantung piang a, a kam pan a husanna tawh vantung nate a piang hi.

⁷ Amah in tuipi tuite thawl khat sunga thun bangin mun khat ah gawm a, tui thukpite tuibeem ah a koih hi.

⁸ Leitung khempeuh in Topa zahtak uh henla, leitung a teengte khempeuh, amah lamdangsakna tawh ding ta uh hen!

⁹ Bang hang hiam cih leh amah pau a, leitung hong piang hi; amah in thu pia a, na khempeuh hong om hi.

¹⁰ Topa in minamteʼ thungaihsutna a mawkna suahin, miteʼ geelna a khaktan hi.

¹¹ Topaʼ thungaihsutna kip ngitnget a, ama lungsim ngaihsutna khang tawntungin a kip hi.

¹² Topa, Pasian-a a nei minam, ama luah dingin teelna a ngah minamte thupha ngah ahi hi.

¹³ Topa in vantung panin hong en suk a, mihing khempeuh a mu hi.

¹⁴ A tutna mun panin amah hong dak khia-in, leitung mite a en hi.

¹⁵ Amauʼ lungsim a bawlpa in amauteʼ gamtatnate en gige hi.

¹⁶ Kumpi khat a galkap tampite in suaktasak zo lo a, galkap hang pa ama hatna tawh kihon khia zo lo hi.

¹⁷ Sakol galkapte pen gualzawh nadingin a mawkna lametna hi a, amauʼ hatna tawh hon zo lo hi.

^18-19 Amah a zahtakte, a itna kip lametna a neite, sihna panin hon khia-in, kialpi hun sungin amaute a hin kep theih nadingin Topa in amaute en tawntung hi.

²⁰ Topa i ngak hi; amah pen eite hong huhpa le i lum ahi hi.

²¹ Ama min siangtho eite in muang ihih manin ama sungah i lungdam hi.

²² Topa aw, nang kong lamet uh mah bangin koteʼ tungah na itna kip hong omsak in.