Late 3 - Tedim Bible Revision 2017

Topa Muangin Zingsang Thungetna

¹ Topa aw, ka galte tam mahmah a, mi tampi tak in kei hong langpan nainai uh hi.

² Pasian in amah huh lo ding, mi tampi in hong ci uh hi.

³ Ahih hangin Topa aw, nang pen ka kidalna lum, ka minthanna le ka lu hong phong pa na hi hi.

⁴ Nakpi takin Topa ka gal sap a, amah in a mual siangtho panin kei a hong dawng hi.

⁵ Lumin ka ihmu a, Topa in hong kem ahih manin ka thokik hi.

⁶ Keimah a hong galbawl keimah a hong umcih mi tul sawm tampite ka kihta kei hi.

⁷ Tho in, Topa! Kei hong hon in, ka Pasian! Bang hang hiam cih leh ka galte khempeuhʼ paang nangmah in na beeng gawp a, migiloteʼ ha na sutan hi.

⁸ Gualzawhna pen Topa nangma hang ahi hi. Na mite tungah na thupha hong tung tahen!