Late 28 - Tedim Bible Revision 2017

Huh ding Ngetna

¹ Topa aw, awngin nang kong sam hi. Ka belh suangpi aw, keima thu ah hong bilngong kei in. Tua bangin kei tungah hong dai dide lecin, Leihawm sunga a pai sukte tawh a kibang ka suak ding hi.

² Siangtho pen mun lamah ka khutte hong laam to a, nangma kiangah huhna kong nget mah bangin kong thumna aw hong za in.

³ Amauʼ lungsim sungah siatna a om hi napi a veengte tawh kilemna thu a gen khem, siatna bawlte, migilote tawh kei hong la khia khawm kei in.

⁴ Amauʼ sepna le a gamtat siatnate uh bangin amaute thukkik in. Amauʼ sepna tawh a kizui-in amaute tungah thuk inla, amauʼ ngah ding a kilawm thaman pia in.

⁵ Amaute in Topaʼ nasepnate thupi ngaihsut lo ahih manun, amah in amaute susia-in a donkik nawn kei ding hi.

⁶ Ka thumna aw hong za ahih manin Topa in thupha ngah tahen.

⁷ Topa, ka hatna le ka lum hi a, amah ka muang hi. Tua ahih manin kei hong kihuh a, lungdamin ka diang a, ka lasakna tawh ama tungah lungdamna ka ko hi.

⁸ Topa, ama miteʼ hatna hi a, amah pen a sathau nilh paʼ bukna le a hon khia pa ahi hi.

⁹ Na mite hon inla, na luahte thupha pia in. Amau a cing pa hi inla, a tawntungin amaute huh in.