Late 24 - Tedim Bible Revision 2017

Minthang Kumpipa

¹ Leitung le a tunga omte, leitung le a tunga teengte Topa-aʼ ahi hi.

² Bang hang hiam cih leh amah in tuipite sungah a bul phut a, tui tungah a kipsak hi.

³ Topaʼ mual tungah kuate kah to ding ahi hiam? Ama mun siangtho ah kuate ding ding ahi hiam?

⁴ Gamtat siangtho le lungsim siangtho a nei, a man lo thu ah a nuntakna pia loin, khemna tawh a kiciam lo mite ahi hi.

⁵ Tua bang mite in Topaʼ tung panin thupha ngah ding uh a, amaute a hon khia Pasianʼ kiang panin diksakna ngah ding uh hi.

⁶ Tua bang mite pen, amah a zong, Jakobʼ Pasianʼ mai a zong minam ahi hi.

⁷ Minthang Kumpipa hong tum theih nadingin, kulh kongpite lian hon unla, tanglai kongkhakte gol hon un.

⁸ Minthang Kumpipa kua ahi hiam? Hatin a vanglian Topa, galhat Topa ahi hi.

⁹ Minthang Kumpipa hong tum theih nadingin, kulh kongpite lian hon unla, tanglai kongkhakte gol hon un.

¹⁰ Hih a minthang Kumpipa kua ahi hiam? Vanglian Topa, minthang Kumpipa ahi hi.