Biblia Todo Logo
Bìoball air-loidhne

- Sanasan -

Late 22 - Tedim Bible Revision 2017


Cimawhin Kikona le Phatna La

1 Ka Pasian, ka Pasian aw, bang hangin kei hong nusia na hi hiam? Nong huh nading ka hong thumna panin bang hangin gamla om na hi hiam?

2 Ka Pasian aw, sunin kong kiko a, ahi zongin nong dawng kei hi. Zanin zong ka kiko a, ahi zongin lungsim nopna ka mu thei tuan kei hi.

3 Ahih hangin nang na siangtho a, Israel-teʼ pahtawi-in na tu hi.

4 Ka pate un nangmah hong muang uh hi. Amaute in hong muang uh a, nangmah in amaute na hon khia hi.

5 Nangma tungah amaute in hong ko uh a, amaute kihon hi. Nangmah hong muang uh a, guaksuak lo uh hi.

6 Ahih hangin kei pen lungno khat bang lel ka hi a, mi ka bang kei hi. Miteʼ ko gawpgawp, miteʼ simmawh ka hi hi.

7 Hong mu mi khempeuh in kei hong zahko-in, hong mukpik san uh a, a lu uh hong pei san hi.

8 “Topaʼ tungah amah in ama thu ap hi. Amah kihonkhiasak un; amah deih ahih manin hon khia tahen!” hong cih san uh hi.

9 Ahih hangin nang pen gil sung panin kei a hong suaksak pa na hi a, ka nuʼ ang sungah a muanhuai-in keimah na hong kem hi.

10 Ka suah tung a kipan nangma tungah kong tung a, ka nu in hong paii lai a kipan keima Pasian na hi hi.

11 Haksatna nai ahih manin kei tawh kigamla om kei in; kei a hong huh ding kuamah dang om lo hi.

12 Bawngtal tampi tak in kei hong umcih uh a, Bashan gam bawngtal hatte in kei hong umcih uh hi.

13 Humpinelkai hawk, a sa bawh nuam bangin amaute in kei hong kamkat beba uh hi.

14 Tui buakkhiat bangin kei hong kibua khia a, ka guh ka taang khempeuh kilawi mangkhin hi. Ka lungtang khuainun bang a, ka awm sungah tui suak hi.

15 Ka thahatna, leibeel phel bangin keu a, ka leii zong toncip ta hi. Nangmah in leivui sungah kei na hong koih hi.

16 Ka kiimah uite om a, siatna bawl mi hon khat in kei hong umcih uh hi. Ka khut ka khete hong sun let zo uh hi.

17 Ka guh khempeuh kimu thei hi. Amaute in hong sal gega uh hi.

18 Amaute in ka puante hawm uh a, ka puan a hawm nadingun lai ai a san uh hi.

19 Ahih hangin Topa aw, gamla om kei in. Keimah a hong huhpa aw, a huh dingin hong manlang in.

20 Namsau panin keimah hong hon inla, uiteʼ kiang panin ka nuntakna hong hon in.

21 Humpinelkai kam panin keimah hong hon inla, gamsialteʼ ki panin a cimawh keimah hong hon in.

22 Ka u ka naute tungah nangma min ka gen dinga, mihon kikhopna laizang ah nangmah kong phat ding hi.

23 Topa a zahtak mi khempeuh aw, amah phat un. Jakobʼ suan mi khempeuh aw, amah min thangsak un. Israel mi khempeuh aw, amah lamdang sa un.

24 Bang hang hiam cih leh amah in a thuak miʼ gimna simmawh bawl lo a, zong kihbawl lo hi. Ama kiang pan a mai seel lo a, ama tungah a koh ciangin, amah in a za hi.

25 Mihonpite lakah nang kong phat nading na piangsak a, nang a hong zahtakteʼ mai ah ka thuciamna kong pia ding hi.

26 Gimna a thuakte in kham takin ne ding uh a, amah a zongte in Topa phat ding uh hi. A lungsim uh nuam tawntung tahen!

27 Leitung mi khempeuh in phawkin Topaʼ lamah kihei ding uh a, minam khempeuh in ama mai ah bia ding uh hi.

28 Bang hang hiam cih leh ukna pen Topa aʼ hi a, minamte tungah amah in a uk hi.

29 Hi hi, a kiphasak mi khempeuh ama mai ah kun suk ding uh a, a si thei mihing khempeuh ama mai ah kun ding uh hi.

30 A hong khangkik mite in ama na sem ding uh hi. Mite in a hong piang lai ding mite tungah Topaʼ thu gen ding uh a,

31 a suak nai lo mite tungah ama sep sa, hotkhiatna thu gen ding uh hi.

Tedim Bible © Bible Society of Myanmar, 2017.

Bible Society of Myanmar
Lean sinn:



Sanasan