Late 21 - Tedim Bible Revision 2017

Gualzawh Manin Lungdam Kohna

¹ Topa aw, na hatna hangin kumpipa lungdam a, na huhna hangin amah nak nuam mahmah hi.

² Ama lungsim deihna teng nangmah in na pia khin a, ama hong ngette na khaktan kei hi.

³ Bang hang hiam cih leh thupha hoihte tawh amah na dawntuah a, ama lu tungah kham siang lukhu na khusak hi.

⁴ Nangma tung panin amah in nuntakna hong ngen a, ama tungah nuntak sau na pia hi.

⁵ Nangma huhna hangin ama minthanna lian a, hoihna le minliatna ama tungah na pia hi.

⁶ Nangmah in a tawntungin thupha ngah pen dingin amah na bawl a, nangma ompihna hangin lungdamna tawh amah na kipaaksak hi.

⁷ Bang hang hiam cih leh kumpipa in Topa muang a, Sangpen paʼ itna kip hangin amah a kiliing kei ding hi.

⁸ Na khut in na galte khempeuh su gawp dinga, na khut taklam in nang hong mudahte su gawp ding hi.

⁹ Na kilat ciangin meiphual kuang bangin amaute na hih ding hi. Topa in hehna tawh amaute nawmvalh dinga, meikuang in amaute kaang tum ding hi.

¹⁰ Leitung panin a suan a khakte, miʼ tateʼ lak panin amauʼ tate na susia ding hi.

¹¹ Nangma langah siat nading vaihawmin, gitlohna a bawl uh hangin tangtung lo ding uh hi.

¹² Bang hang hiam cih leh amaute na taisak dinga, na thal tawh a maitang uh na ngim ding hi.

¹³ Topa aw, na hatna hangin nang hong kipahtawi tahen! Nangma vangliatna la sa-in kong phat ding uh hi.