Late 20 - Tedim Bible Revision 2017Gualzawh nading Thungetna 1 Gimna na thuak ciangin Topa in nang hong en henla, Jakobʼ Pasian in nangmah hong dal tahen! 2 Siangtho mun panin huhna nang hong puak henla, Zion panin nang hong panpih tahen! 3 Na biakpiaknate khempeuh amah in hong phawk henla, na meihal biakpiakna hong sang tahen! 4 Na lungsimʼ deihna amah in hong pia henla, na geelna khempeuh hong tangtungsak tahen! 5 Na gualzawhna ah eite lungdamin awngin, i Pasianʼ min tawh i lante khai ni! 6 Topa in a sathau nilh pa a huh ding tu-in ka thei ta a, ama vantung siangtho panin amah dawng dinga, a vangliatna tawh amah gualzosak ding hi. 7 Mi pawl khat in leengte kisaktheih pih a, mi pawl khat in sakolte kisaktheih pih hi. Ahih hangin eite in Topa i Pasianʼ min bek i kisaktheih pih hi. 8 Amaute kinawmsawmin puk gawp ding uh a, ahih hangin eite tho-in i ding tang ding hi. 9 Topa aw, kumpipa tungah gualzawhna pia inla, kong sap ciangun hong dawng in. |
Tedim Bible © Bible Society of Myanmar, 2017.
Bible Society of Myanmar