Late 19 - Tedim Bible Revision 2017

Nate le Ama Thu ah Pasianʼ Minthanna

¹ Vantung in Pasianʼ minthanna gen a, vanpi in ama nasepna taangko hi.

² Nisimin thu gengen a, zan simin theihtelna pulaklak hi.

³ Pauna le kammal om lo a, amauʼ aw kiza lo hi.

⁴ Ahih hangin a aw uh leitung khempeuh ah kizel a, a kammal uh leimong dongah a tung hi. Amauʼ sungah ni ading omna khat bawl khin a,

⁵ a inn sung pan a hong pusuak zipi tangval tawh ahi zongin, lungtaii takin tai ding a kipan mi thahat khat tawh ahi zongin a kibang hi.

⁶ Ama suahna van mong pan hi a, mong khat dongin pai a, ama satna panin a kiliah thei bangmah om lo hi.

⁷ Topaʼ thu kicing a, nuntakna a thaksuaksak hi. Topaʼ teci panna hi takpi a, mipil lote pilsak hi.

⁸ Topaʼ thuhilhte man a, lungsim nuamsak hi. Topaʼ thupiakna siang a, mitte vaksak hi.

⁹ Topa a kizahtakna siang a, kip tawntung hi. Topaʼ ngeina kipte thuman a, a vekin kituakin man kim hi.

¹⁰ Kham sangin ahi zongin kham hoih pen sang ahi zongin tuate deihhuai zaw a, khuaizu le khuailuzu taakte sangin zong khum zaw lai hi.

¹¹ Tua tham loin tuateʼ hangin a nasem pa in thuphawkna ngah a, tuate zuihna ah noptuamna lian a om hi.

¹² Ahih hangin kua in ama khialhnate mu khia thei tawm ahi hiam? Theih loh manin khialhna panin kei hong siangsak hi.

¹³ Mawh kaltangnate panin zong na nasem pa hong kem inla, tuate keima tungah hong uksak kei in! Tua ciangin kei ka kawkbaang kei dinga, mawhna liante panin ka siang ding hi.

¹⁴ Topa, ka belh suangpi le keimah hong tan khia pa aw, ka kammal le ka lungsim ngaihsutnate nangma muhna ah a sanhuai suaksak ta in!