Late 16 - Tedim Bible Revision 2017

Pasian, Nuntakna ah a hoih Bulpi

¹ Pasian aw, nang hong bel ka hih manin keimah hong kem in.

² Topa tungah, “Nang, ka Topa na hi hi; nang tawh loin hoihna ka nei kei hi,” ka ci hi.

³ Leitungah a om mi siangthote ahihleh, amaute nampi hi a, amaute sungah ka lungkimna teng om hi.

⁴ Pasian dang a teelte in amauʼ dahna khangsak hi. Amauʼ si theh biaknate keʼn bawl pih loin, amauʼ pasian-te ka biakpih kei ding hi.

⁵ Topa pen keima luah dinga ka teel sa, keima muanpi na hi a, keima ngah ding khempeuh na khut sungah om hi.

⁶ Kei-aʼ pen mun nuam mahmah sung hong tu ahih manin gamhluah hoih nei ka hi hi.

⁷ Ngaihsutna a hong lak Topa ka phat a, zanin zong ka lungsimah hong suak hi.

⁸ Topa ka maingat tawntung a, ka tak lamah amah om ahih manin ka kiliing kei ding hi.

⁹ Tua ahih ciangin lungdamin ka kipak a, lungmuangin ka om hi.

¹⁰ Bang hang hiam cih leh Leinuai nong zuansak kei a, na mihoih pa Leihawmpi na musak kei hi.

¹¹ Nangmah in nuntakna lampi keimah nong lak hi. Nangma omna munah lungdamna lianpi om a, nangma tak lamah nop tawntungnate a om hi.