Late 148 - Tedim Bible Revision 2017

A Kipiangsak Khempeuh in Topa Phat Ding

¹ Topa phat un. Vantung panin Topa phat unla, a sangna panin amah phat un.

² Ama vantungmi khempeuh aw, amah phat un. Ama mihonte khempeuh aw, amah phat un.

³ Ni le kha aw, amah phat un. A taang aksi khempeuh aw, amah phat un.

⁴ Van sang pen te le vantung a om tuite aw, amah phat un.

⁵ Topaʼ min amaute phatsak un. Bang hang hiam cih leh amah in thu pia a, amaute a piang hi.

⁶ Amaute a tawntung a om dingin amah in kipsak a, a palsat loh ding uh thupiakna amah in a bawl hi.

⁷ Leitung panin Topa phat un, no gulpi liante le tuipi thuk khempeuh,

⁸ mei le gial, tuikhal le vuk, ama thupiakna a mang huihpi!

⁹ Amah phat un, no mual liante le mual neute khempeuh, gah a nei singkungte le taamtak singkung khempeuh!

¹⁰ Gamsate le innsate khempeuh, a bokvak ganhingte le a leeng vasate khempeuh!

¹¹ No leitung kumpite le mihing khempeuh, leitung uliante le thukhente khempeuh!

¹² Nungakte le tangvalte, teeksiate le naupangte aw, amah phat un.

¹³ Topaʼ min phat un. Bang hang hiam cih leh amah bek a min lian hi a, ama minthanna pen leitung le vantung sangin sang zaw lai hi.

¹⁴ Amah in ama mite thahatsak a, ama mi siangthote khempeuh, ama mai ah a om Israel-te khempeuh in amah phat uh hi. Topa phat un.