Late 147 - Tedim Bible Revision 2017

Vanglian Pasian Phatna

¹ Topa phat un. Bang hang hiam cih leh eiteʼ Pasianʼ tungah phatnate i sak ding hoih hi. Phatna sak ding nuam a, zong a kilawm ahi hi.

² Topa in Jerusalem khuapi lam a, amah in a kinil khia Israel-te a kaikhawm hi.

³ Amah in lungsim kitamte damsak a, amauʼ meimate a tuamsak hi.

⁴ Amah in aksite a phazah ding seh a, tua aksite amau min ciatin a sam hi.

⁵ Eiteʼ Topa lian a, ama vang lian mahmah hi. Amah in thu a theihtelna pen ngaihsut zawh ding hi lo hi.

⁶ Topa in a kisikcip mite laam to-in, migilote leilak a denna hi.

⁷ Topa tungah lungdamkohna la sa unla, laiza lasakna tawh eiteʼ Pasianʼ tungah la ngaih sa un.

⁸ Amah in vanpite meiipi tawh tuamin, leitung adingin gun bawl a, mualte tungah lopa a posak hi.

⁹ Amah in ganhingte le a ham va-aknote an a vak hi.

¹⁰ Ama lungkimna le amah in nuam a saknate pen sakol thahatna le galhangteʼ hang hi lo hi.

¹¹ Amah a zahtak mite le ama itna kip a muangte tungah Topa a lungkim hi.

¹² Jerusalem khuapi aw, Topa phat in. Zion aw, nangma Pasian phat in.

¹³ Bang hang hiam cih leh amah in na kulh kongpi zawlte tosak a, nangma mite thupha hong piaksak hi.

¹⁴ Amah in na gam sungah kilemna bawl a, mangbuh hoih pente tawh nang hong gilvahsak hi.

¹⁵ Amah in thu hong pia a, ama thu manlangin leitung hong tung suk hi.

¹⁶ Amah in tuumul bangin vukkhal hong pia a, vut bangin vukpak hong thehthang hi.

¹⁷ Amah in suangtum bangin tui khalte hong lawn khia hi. Tua a votna kua in thuak zo ding ahi hiam?

¹⁸ Amah in thu pia-in tuate tui suak hi. Amah in a huih nungsak a, tuite a luang hi.

¹⁹ Amah in Jakob tungah ama thu gen a, Israel tungah ama ngeina kipte le ama biakna ngeina kipte a gen hi.

²⁰ Amah in tua bangin minam dang khat peuhpeuh tungah bawl ngei lo hi. Amaute in amah biakna ngeina kipte thei lo uh hi. Topa phat un.