Late 146 - Tedim Bible Revision 2017

Pasian, Mite A Huh, A Lianpa

¹ Topa phat un. Keʼn, Topa ka phat ding hi.

² Ka hin lai teng Topa ka phat dinga, ka nuntak lai teng ka Pasianʼ tungah phatnate ka sa ding hi.

³ Huhna a hong pia thei lo uliante ahi a, mi mawkmawkte ahi zongin muang kei un.

⁴ A husanna a bei ciangin lei ah ciahkik uh a, tua ni mahmah in a ngaihsutnate uh bei ta hi.

⁵ Jakobʼ Pasian pen amah huhpa hi-in, ama Topa Pasian a muang mipa mi lungdam ahi hi.

⁶ Amah in vanlelei, tuipi le tuate sungah a om khempeuh bawl a, a tawntungin thuman hi.

⁷ A kinengniam mite adingin thumanna sem khia a, gilkialte an a vak hi. Topa in thongkiate a khah khia hi.

⁸ Topa in mittawte khua a musak hi. Topa in niamsakna a thuak mite sangtosak a, Topa in thuman mite a it hi.

⁹ Topa in peemtate kem a, meigong numeite le pa nei lote a huh hi. Ahih hangin amah in migiloteʼ vaihawmna a suksiatsak hi.

¹⁰ Zion aw, nangma Pasian Topa in khang tawntungin uk ding hi. Topa phat un.