Late 143 - Tedim Bible Revision 2017

Hotkhiat ding Ngetna

¹ Topa aw, ka thungetna hong za inla, kong thumnate hong ngai in. Na thumanna le na thutakna tawh kizui-in kei hong dawng in.

² Na nasem pa, thu hong sit kei in. Bang hang hiam cih leh nangma mai ah mihing a dik zo kuamah om lo hi.

³ Bang hang hiam cih leh gal in kei hong bawlsia-in hong zo gawp hi. Sau veipi lai-a a site bangin a mial sungah hong tusak hi.

⁴ Tua ahih ciangin cih nading ka thei nawn kei a, ka lungtang ah si teng nawn lo hi.

⁵ Hun luite ka phawk a, na sep sa khempeuh ka ngaih sunsun hi. Na khut in a sep sa nate ka lung ngaingai hi.

⁶ Thu ngenin nang lamah ka khutte ka hong zan a, lei keu in tui a duh bangin nang ka hong duh hi.

⁷ Topa aw, kei hong dawng mengmeng in. Kei ka cimawh ta hi. Leihawm sung misite kiangah a pai sukte tawh ka kibat loh nadingin kei kiang panin na maitang seel kei in.

⁸ Nang hong muang ka hih manin zingsang simin na itna kip kei hong phawksak in. Nangma tungah thu hong ngen ka hih manin ka pai nading lampi hong hilh ta in.

⁹ Topa aw, ka langteʼ kiang panin kei hong hon khia in. Nangmah a beel dingin ka hong tai hi.

¹⁰ Keima Pasian na hih manin nangma deih bangin a gamta dingin kei hong hilh in. Kei hong hehpih inla, lam phei ah hong kha in.

¹¹ Topa aw, nangma min na ngaihsutna-in keima nuntakna hong kem in. Nangma thumanna tawh kituakin haksatna panin hong paikhiatpih in.

¹² Kei pen nangma nasem ka hih manin na itna kip tawh kituakin ka galte khen khia inla, ka langte khempeuh susia in.