Late 141 - Tedim Bible Revision 2017

Thuman Theih Nading Ngetna

¹ Topa aw, nang kong sam hi; hong kinawh in. Nang kong sap ciangin ka aw hong ngai in.

² Ka thungetna pen na mai ah paknamtui bangsak inla, ka khutte ka lap tohna pen nitak biakpiakna bangsak in.

³ Topa aw, keima kam a cing ding khat koih inla, ka mukteʼ kongkhak a vil ding khat koih in.

⁴ Mawh bawlnopna lungsim hong neisak kei inla, a gilo mite tawh hong kikhawlsak kei in. Amauʼ anlimte hong duhgawhsak kei ta in.

⁵ Mipha pa kei hong vuasak inla, ahih hangin migilote ka lu sathau nilhsak kei in; bang hang hiam cih leh amauʼ gitloh gamtatnate nakpi takin langpangin thu ka ngenngen hi.

⁶ Amaute, thu kisitin mawhsakna a thuak uh ciangin, Topaʼ thute man hi, ci-in a thei ding uh hi.

⁷ Mi khat in suangpi khat sukhamin leitungah a thehthang gawp bangin Leinuaiʼ kongvang ah amauʼ guhte kithehthang hi.

⁸ Ahih hangin Topa Pasian aw, nang kong muang tawntung a, nangmah kong bel hi. Tua ahih manin kei hong nusia kei in.

⁹ Amaute in kei hong siahna uh tehlop le siatna bawlteʼ thangzak panin kei hong kem in.

¹⁰ Kei ka suahtak khit ciangin amauʼ ngenthang sung mahah migilote awksak in.