Late 140 - Tedim Bible Revision 2017A Ngongtatteʼ Kiang pan Hut ding Ngetna 1 Topa aw, migilote kiang panin kei hong hon khia inla, mi ngongtatte kiang panin kei hong kem in. 2 Amaute in a lung sung uh ah thusia geelgeel uh a, gal phuang ngitnget uh hi. 3 A leii uh gulpi leii bang a, a thugente uh gulgu bang hi. 4 Topa aw, migiloteʼ khut sung panin kei hong cing inla, kei, suk paih ding a hong sawm mi ngongtatte kiang panin kei hong kem in. 5 Mi kiphasakte in keimah hong siahna-in tehlop tung sim uh a, amaute in ngenthang zakin lam gei ah thangzak tawh kei hong siah uh hi. 6 Topaʼ tungah hih bangin ka ci hi: Nang pen keima Pasian na hi hi; ka thumna awte hong ngai in, Topa! 7 Topa, keima Topa, a thahat hong hon khia pa aw, gal kidona sungah keimah nong hu hi. 8 Topa aw, migilo paʼ deihnate tangtungsak kei inla, ama thusia sawmna a maban sotsak kei in! 9 Kei hong umcih mite gualzosak kei inla, kei hong sawmnate uh amauʼ lu tung mah tusak in! 10 Amaute tungah mei-am kuang zusak in. A thokik zo nawn lo dingin dum sungah amaute kiasak in! 11 Mi gensia pa leitungah mavangsak kei inla, mi ngongtat pa pen thusia in sulzuih tahen! 12 Topa in gimna a thuak miteʼ thu a panpihna, mi cimawhte adingin thu a manin a khenna ka thei hi. 13 Thuman mite in nangma min hong phat pelmawh ding uh a, lungsim thutangte pen nangma omna ah teeng ding uh hi. |
Tedim Bible © Bible Society of Myanmar, 2017.
Bible Society of Myanmar