Late 14 - Tedim Bible Revision 2017Miteʼ Haina le Gitlohna ( La 53:1-6 ) 1 Mihaite in a lungsim sung uh ah, “Pasian om lo hi,” ci-in ngaihsun uh hi. Amaute sia uh a, kihhuai gamtat uh a, a hoihin a gamta kuamah om lo hi. 2 A pil gamtat, Pasian a zong a om uh hiam, cih a theih nadingin Topa in vantung panin mihingte hong en suk hi. 3 Amaute khempeuh a vekpi-un puk khin uh hi. A kibangin sia kim uh a, a hoihin a gamta khat zong om lo hi. 4 Topaʼ tungah thu a ngen lo, annek bangin ka mite a ne tum, siatna a bawlte in thutheihna nei lo ahi hiam? 5 Launa lianpi sungah amaute om ding uh hi; bang hang hiam cih leh Pasian in midikte ompih hi. 6 Mizawngteʼ geelna susia nuam uh a, ahih hangin Topa pen mizawngteʼ belh ahi hi. 7 Israel-te ading hotkhiatna Zion panin hong tun nading thu ka ngenngen hi. Topa in ama mite tungah nopsakna a piakkik ciangin, ama mi Israel-te kipak mahmah ding uh hi. |
Tedim Bible © Bible Society of Myanmar, 2017.
Bible Society of Myanmar