Late 138 - Tedim Bible Revision 2017

Pasianʼ Maipha Hangin Phatna

¹ Topa aw, ka lungsim khempeuh tawh nangma tungah lungdamna kong ko a, pasian-teʼ mai ah nangmah phatna ka sa hi.

² Na biakinn siangtho lamah kei ka kun a, na itna kip le na thumanna hangin na min kong phat hi. Bang hang hiam cih leh na dang khempeuh sangin na min le na thu a liatzawkna na lak hi.

³ Nang kong sap ciangin kei nong dawng a, na thahatna tawh kei nong tha khauhsak hi.

⁴ Topa aw, leitung khempeuh in na thuciamnate za khin uh ahih manin nang hong phat ding uh hi.

⁵ Topaʼ minthanna lian mahmah ahih manin amaute in Topaʼ nasepna ziate la-in sa ding uh hi.

⁶ Bang hang hiam cih leh Topa lian mahmah napi-in amah in a neute don a, a kiphasakte ahihleh amah in gamlapi panin mu thei veve hi.

⁷ Haksatna tuamtuamte ka thuak ciangin kei nong kem hi. A heh ka galte, keiʼ tangin nong dosak a, na thahatna tawh kei na hong hon khia hi.

⁸ Topa in kei adingin a ngaihsutte hong tungsak ding hi. Topa aw, na itna kip tawntung hi. Na sep sa na maban hong tun ta in.