Late 136 - Tedim Bible Revision 2017

Pasianʼ Itna Hangin Lungdamna

¹ Amah hoih ahih manin Topa tungah lungdamna ko un; bang hang hiam cih leh ama itna kip tawntung hi.

² Lungdamna pen pasian-teʼ Pasianʼ tungah ko un; bang hang hiam cih leh ama itna kip tawntung hi.

³ Lungdamna pen topateʼ Topaʼ tungah ko un; bang hang hiam cih leh ama itna kip tawntung hi.

⁴ Nalamdang lian a bawl amah bek Pasian ahi paʼ tungah, bang hang hiam cih leh ama itna kip tawntung hi.

⁵ Theihna tawh vantungte a bawlpa tungah, bang hang hiam cih leh ama itna kip tawntung hi.

⁶ Tuite tungah leitung a zal pa tungah, bang hang hiam cih leh ama itna kip tawntung hi.

⁷ Khuavak lianpite a bawlpa tungah, bang hang hiam cih leh ama itna kip tawntung hi.

⁸ Sun pen ni a uksak pa tungah, bang hang hiam cih leh ama itna kip tawntung hi.

⁹ Zan pen kha le aksite a uksak pa tungah, bang hang hiam cih leh ama itna kip tawntung hi.

¹⁰ Egypt gam tacil khempeuh a vatmaipa tungah, bang hang hiam cih leh ama itna kip tawntung hi.

¹¹ Amauʼ gam sung pan Israel-te a paikhiatpih pa tungah, bang hang hiam cih leh ama itna kip tawntung hi.

¹² A baan zanin a khut thahat tawh a paikhiatpih pa tungah, bang hang hiam cih leh ama itna kip tawntung hi.

¹³ San Tuipi a phel kham pa tungah, bang hang hiam cih leh ama itna kip tawntung hi.

¹⁴ Israel-te tui laizang a kantan sakpa tungah, bang hang hiam cih leh ama itna kip tawntung hi.

¹⁵ Ahih hangin Faro le a mihonte San Tuipi sungah a thal paih pa tungah, bang hang hiam cih leh ama itna kip tawntung hi.

¹⁶ Sehnel gam nawkin ama mite a paipih pa tungah, bang hang hiam cih leh ama itna kip tawntung hi.

¹⁷ Kumpi liante a vatmaipa tungah, bang hang hiam cih leh ama itna kip tawntung hi.

¹⁸ Kumpi minthangte a that pa tungah, bang hang hiam cih leh ama itna kip tawntung hi.

¹⁹ Amor miteʼ kumpipa Sihonʼ hang le, bang hang hiam cih leh ama itna kip tawntung hi;

²⁰ Bashan kumpipa Ogʼ hangin, bang hang hiam cih leh ama itna kip tawntung hi.

²¹ Amauteʼ leitang pen gamhluah dingin a pia khia pa tungah, bang hang hiam cih leh ama itna kip tawntung hi.

²² Ama nasem Israel tungah gamh a a pia pa tungah, bang hang hiam cih leh ama itna kip tawntung hi.

²³ Mi niam ihih laitakin a hong phawk pa tungah, bang hang hiam cih leh ama itna kip tawntung hi.

²⁴ I galteʼ kiang pan eite hong hon khia pa tungah, bang hang hiam cih leh ama itna kip tawntung hi.

²⁵ Nuntakna a nei khempeuh an a vak pa tungah, bang hang hiam cih leh ama itna kip tawntung hi.

²⁶ Vantung Pasianʼ tungah lungdamna ko un; bang hang hiam cih leh ama itna kip tawntung hi.