Late 135 - Tedim Bible Revision 2017

Topa Lian: Milim A Mawkna

^1-2 Topa phat un. I Pasianʼ inn huang sung, Topaʼ inn sunga a ding, Topaʼ nasemte aw, Topa phat un; ama min phat un.

³ Topa phat un; bang hang hiam cih leh Topa hoih hi. Ama minphatna la sak un; bang hang hiam cih leh amah phatnophuai hi.

⁴ Bang hang hiam cih leh Topa in ama adingin Jakob teel a, ama neihsa dingin Israel teel khinta hi.

⁵ Bang hang hiam cih leh Topa lian hi, ci-in ka thei a, eiteʼ Topa pen pasian dang khempeuh sangin a lian zaw hi.

⁶ Vantung le leitung, tuipi le a thukna sung khempeuh ah Topa in ama ut peuhpeuh a bawl hi.

⁷ Amah in leimong panin meiipi kaisakin, guahzuk nadingin khuaphialepte bawl a, a huihkua panin huih a pusuaksak hi.

⁸ Amah in Egypt gam sungah mihing ganhing tacil khempeuh a vatmai hi.

⁹ Egypt aw, nangma sungah lim le nalamdangte, Faro le a nasem khempeuhte gimpiakna-in a lak hi.

¹⁰ Minam tampite vat mai-in kumpi vangliante that a,

¹¹ Amor kumpipa Sihon, Bashan kumpipa Og le Kanaan kumpite a that hi.

¹² Amauʼ leitang khempeuh, ama mi Israel-teʼ luah dingin a pia khia hi.

¹³ Topa aw, nangma min kip tawntung hi. Topa aw, na minthanna khang tawntungin a kip hi.

¹⁴ Bang hang hiam cih leh Topa in ama miteʼ thu khenin, ama nasemte tungah hehpihna a nei ding hi.

¹⁵ Minam dangteʼ pasian-te pen mihingteʼ khut tawh a kibawl, ngun le kham ahi hi.

¹⁶ Amaute in kam nei napi, pau thei lo uh hi. Amaute in mit nei napi, khua mu thei lo uh hi.

¹⁷ Amaute in bil nei napi, khua za thei lo uh hi. Amauteʼ kam sungah nak suk nak toh theihna nei lo uh hi.

¹⁸ Milim a bawl mite pen milim mah bangsak in. Milim a muang khempeuhte zong tua milimte mah bangsak in.

¹⁹ Israel mite aw, Topa phat un. Aaronʼ innkuante aw, Topa phat un.

²⁰ Levi mite aw, Topa phat un. Topa a zahtakte aw, Topa phat un.

²¹ Jerusalem inn-a a nei, Zion-a om Topa in thupha ngah tahen. Topa phat un.