Late 132 - Tedim Bible Revision 2017

Pasianʼ Inn Deihna

^1-5 Topa aw, David na ngaihsutna-in a gim thuaknate khempeuh le amah in, “Jakobʼ Vanglian paʼ ten nading, Topa ading mun ka muh matengin ka inn sungah ka lum kei dinga, ka lupna ka zuan kei ding hi. Ka ihmu kei dinga, ka mitkhute ka kikhupsak kei ding hi,” ci-in Jakobʼ Vanglian paʼ tungah hong thuciamna le Topaʼ tungah hong kiciamnate phawk in.

⁶ Jaar gam sungah Thuciamna Singkuang ka mu uh hi, cihna thu thak Bethlehem ah kiza hi.

⁷ “Ama omna munah va pai ni; ama khengakna ah va bia ni,” ka ci uh hi.

⁸ Topa aw, tho inla na vangliatna lim Thuciamna Singkuang tawh na omna munah pai in.

⁹ Na mite na hotkhiatna thu, na siampite in taangko henla, na mi siangthote lungdamin awng ta uh hen.

¹⁰ Na nasem pa David tungah thu na ciam zo hi; na sathau nilh pa nial kei in.

¹¹ Topa in a pelh loh ding kiciamna taktak khat David tungah kiciam a, “Nangʼ sung pan a na tate khat na kumpi tokhom tungah ka koih ding hi.

¹² Na tate in, amauʼ tungah ka hilh ding ka thuciamna le ka teci pannate a zuih nak uh leh, amauʼ tate zong na kumpi tokhom tungah tu paisuak ding uh hi,” na ci hi.

¹³ Bang hang hiam cih leh Topa in Zion teel khinzo a, amah in tua mun pen ama ten nadingin a deih hi.

¹⁴ “Hih mun pen ka om tawntung nading ahi hi; hih mun deih ka hih manin hih lai ah ka teeng ding hi.

¹⁵ Ama beemlepang thupha tampi ka pia dinga, a mizawngte an ka vak kham ding hi.

¹⁶ Ka hotkhiatna thu, a siampite ka taangkosak dinga, a mi siangthote lungdamin la sa-in awng ding uh hi.

¹⁷ Keimah in tua lai ah Davidʼ suanlekhakte kumpi lianin ka koih dinga, ka sathau nilh paʼ ukna ka kipsak ding hi.

¹⁸ Ama galte maizumna tawh ka dimsak dinga, ahih hangin ama kumpi gam khangin zai semsem ding hi,” na ci hi.