Late 127 - Tedim Bible Revision 2017

Pasian, Hauhna Hong Pia pa

¹ Topa in inn lam pih kei leh innlamteʼ sepna a mawkna ahi hi. Topa in khuapi hut pih kei leh khuapi cingteʼ cinna a mawkna ahi hi.

² Zingsangin tho baihin, gimpi a nangma sep sa an na nek hakna zong a mawkna mah ahi hi. Bang hang hiam cih leh amah in ama itte tungah a ihmut sung nangawnun a pia hi.

³ En un, tate pen Topaʼ tung pan a letsong hi a, tapate pen ama hong piak thupha ahi hi.

⁴ Mi khat in a khangno lai-in a neih tate pen galhang paʼ khut sunga a om a thaltangte tawh kibang hi.

⁵ A thallawng dimin tua bang thaltang a nei pa mi lungdam ahi hi. Amah guallel ngei lo dinga, zahhuai ngei lo ding hi.