Late 118 - Tedim Bible Revision 2017

Topaʼ Hehpihna Kip Tawntung

¹ Topa tungah lungdamna ko un. Bang hang hiam cih leh amah hoih a, ama itna kip tawntung hi.

² “Ama itna kip tawntung hi,” Israel-te in ci ta uh hen.

³ “Ama itna kip tawntung hi,” Aaron innkuante in ci ta uh hen.

⁴ “Ama itna kip tawntung hi,” amah a zahtakte in ci ta uh hen.

⁵ Ka cihmawhna ah Topa ka sam a, Topa in hong dawngin mun tanzau ah hong koih hi.

⁶ Topa in kei hong ompih hi. Bangmah ka kihta kei ding hi. Mihingte in kei, bang hong cih zo ding ahi uh hiam?

⁷ Kei hong huh dingin kei lamah Topa om hi. Kei hong mudahte pen gualzawhna tawh ka en ding hi.

⁸ Mi i muan sangin Topa belh ding hoih zaw hi.

⁹ Uliante i muan sangin Topa belh ding hoih zaw hi.

¹⁰ Minam khempeuh in kei hong umcih uh hi. Ahih hangin Topaʼ vang tawh amaute ka su gawp hi.

¹¹ Amaute in ka kimkot ah kei hong umcih uh hi. Ahih hangin Topaʼ vang tawh amaute ka su gawp hi.

¹² Amaute in khuaipi bangin kei hong umcih uh a, ahi zongin selkeu kuang bangin amaute daikik pak uh hi. Topaʼ vang tawh amaute ka su gawp hi.

¹³ Kei ka puk nadingin nakpi takin hong kisawn a, ahih hangin Topa in kei hong huh hi.

¹⁴ Topa in a vanglian, a thahatin kei hong bawl a, amah pen kei a hong honpa ahi hi.

¹⁵ Ngai un! Thuman miteʼ puanbuk sungah gualzawh lungdamna la kisa a, “Topaʼ taklam khut in a lian nate hih khin hi.

¹⁶ Topaʼ taklam khut kipahtawi a, Topaʼ taklam khut in a lian nate hih khin hi,” kici hi.

¹⁷ Kei ka si kei dinga, ka nungta ding hi. Topaʼ sepnate ka gengen ding hi.

¹⁸ Topa in nasia takin kei hong thuhilh a, ahih hangin kei hong sisak lo hi.

¹⁹ Topaʼ tungah lungdamna ko-in ka lut theih nadingin biakinn kongpite kei hong hon in.

²⁰ Hih pen Topaʼ kongpi ahi hi. Thuman mi bek hih kongpi ah lut ding hi.

²¹ Nangmah in kei hong dawngin, hong hon khia na hih manin nangma tungah ka lungdam hi.

²² Innlamte in a nilkhiat suang pen innkiu suang bulpi suak khinta hi.

²³ Hih pen Topaʼ nasepna hi a, eiteʼ mitah lamdang hi.

²⁴ Hih ni pen Topaʼ hong piak ni hi a, eite lungdamin i kipak ding hi.

²⁵ Topa aw, kote hong hon in; hong thum ung. Topa aw, kong thum uh hi; kote hong daupaisak in.

²⁶ Topaʼ min tawh hong pai pa in thupha ngah tahen. Topaʼ inn panin nang kong phat uh hi.

²⁷ Topa pen Pasian ahi hi. Amah in eite tungah nopsakna hong pia zo hi. Na khut uh ah singhiang tawi-in, biakna tau kimkotin pai un.

²⁸ Nang pen keima Pasian na hi a, nangma tungah lungdamna kong ko ding hi. Nang pen keima Pasian na hi a, nangmah kong phat ding hi.

²⁹ Topa tungah lungdamna ko un; bang hang hiam cih leh amah hoih a, ama itna kip tawntung hi.