Late 116 - Tedim Bible Revision 2017

Sihna panin Hotkhiat manin Lungdamkohna

¹ Topa ka it hi; bang hang hiam cih leh amah in ka aw hong za-in ka thumnate hong ngai hi.

² Amah ka sap sialin ka sapna aw hong ngai hi.

³ Sihna khau in kei hong gakcip hi. Leinuai sihna in kei hong mancip a, natna le lungkhamna ka thuak hi.

⁴ Tua ciangin Topaʼ tungah thu ngenin, “Topa aw, nang tungah kong thum hi; kei hong hon in,” ka ci hi.

⁵ Topa dikin thuman a, i Pasian in hehpihna nei hi.

⁶ Topa in thu thei lo mi hong kem a, kei hong kiniamkoih ciangin amah in hong huh hi.

⁷ Lungmuang takin ka om ding hi; bang hang hiam cih leh keima tungah Topa hong thunuam hi.

⁸ Topa in sihna panin kei hong hon khia hi. Ka khituite hong kangsak a, kei hong guallelsak lo hi.

⁹ Tua ahih ciangin mihingteʼ omna leitung, Topaʼ mai ah nungta-in ka vak kawikawi hi.

¹⁰ “Nakpi takin gimna ka thuak hi,” ka cih hun ciang nangawnin ka upna mah ka len cinten hi.

¹¹ Lunghihmawhna tawh, “Mi khempeuh zuaugen vive hi,” ka cih hun nangawnin ka um lailai hi.

¹² Kei tunga ama thupha tampite Topaʼ tungah bangci thuk ding ka hi hiam?

¹³ Topa in kei hong hotkhiat ka lungdamna hangin, ama kiangah tui phih biakna ka paipih ding hi.

¹⁴ Topaʼ tungah ka thuciamnasa pen ama mite khempeuh a kikhopna munah ka pia ding hi.

¹⁵ Ama mi siangthote a sih ciangin Topa in na sa mahmah hi.

¹⁶ Topa aw, kei pen nangma nasem ka hi hi. Nangma nasem ka hi a, na nasem nuʼ ta ka hi hi. Keimah hong kikhihnate nong sutkhiatsak zo hi.

¹⁷ Lungdam koh biakpiakna nang tungah kong pia dinga, Topaʼ tungah thu kong ngen ding hi.

^18-19 Jerusalem khuapi aw, ama mi khempeuh a omna sung, Topaʼ inn huang sung, nangma laizang ah, Topaʼ tungah ka thuciamnasa ka pia ding hi. Topa phat un.