Late 114 - Tedim Bible Revision 2017

Egypt Panin Israel-te Hotkhiatna

¹ Israel-te, Egypt gam panin pusuakin, Jakob innkuanpihte pau dang a zang mite kiang pan a paikhiat uh ciangin

² Judah-te, Topaʼ mi siangtho suak a, Israel-te, ama uk mi a suak hi.

³ Tuipi in amaute mu-in tai khia a, Jordan gun a nungkik hi.

⁴ Mual liante tuutal bangin diang uh a, mual neute tuuno bangin a diang uh hi.

⁵ Tuipi aw, na taikhiat nading, Jordan gun aw, na nungkik nading,

⁶ mual liante aw, tuu bangin mual neute aw, tuuno bangin na dianna ding uh bang in hong nasak ahi hiam?

^7-8 Leitung aw, suangpi, bualtui suaksak a, meisuang, ciktui a suaksak, Jakobʼ Pasianʼ omna, Topaʼ omna ah liing in.