Late 111 - Tedim Bible Revision 2017

Topaʼ Liatna le A Hoihna

¹ Topa phat un. Lungsim thutangte a omna, mihon kikhopna sungah ka lungsim khempeuh tawh Topaʼ tungah lungdamna ka ko ding hi.

² Topaʼ nasepna lian a, hoih a sa mi khempeuh in tuate kankan uh hi.

³ Ama nasepnate, pahtawina le minliatna tawh kidim a, ama thumanna kip tawntung hi.

⁴ Amah in phawk tawntung dingin a lamdang nasepnate hong bawl a, Topa dikin hehpihna nei hi.

⁵ Amah in amah a zahtakte an pia a, a thuciamna a phawk tawntung hi.

⁶ Amah in ama mite tungah minamteʼ gamh a piakna tawh ama vangliatna hong lak khin hi.

⁷ Ama nasepnate khempeuh ah amah thumanin citak a, a thupiaknate muantaak mahmah hi.

⁸ A tawntungin tuate kip ngitnget a, thuman le thutang tawh zuih ding ahi hi.

⁹ Amah in ama mite hon khia a, a tawntung a kimang dingin thupiakna a bawl khin hi. Ama min siangtho-in vanglian mahmah hi.

¹⁰ Topa zahtakna pen pilna kipatna ahi hi. Ama thupiak a zuite khempeuh tungah thukhen siamna a pia hi. Amah phat tawntung ding ahi hi.