Late 109 - Tedim Bible Revision 2017

Thukkik Ding Ngetna

¹ Keima hong phat Pasian aw, dai dide-in om mawk kei in.

² Bang hang hiam cih leh migilote le zuau thu gente keima langah hong pang uh a, keimah hong gensia-in, zuau thu bekbek genin nei uh hi.

³ Amaute in muhdah kamte pau-in kei hong gensia uh a, thu om lopi-in kei hong langpang uh hi.

⁴ Amaute ka itna, amaute adingin thu ka ngetsakna nangawn amaute in hong thukna-in kei hong mawhsak uh hi.

⁵ Tua ahih ciangin amaute in hoihna adingin siatna itna adingin muhdahna tawh kei hong thuk uh hi.

⁶ Ka gal paʼ langah migilo khat pangsak inla, thusitna a thuak dingin mawhna a zong mi khat paipihsak in.

⁷ Amah thu a kisit ciangin thu lelin pusuaksak inla, ama hong thumnate zong mawhna suaksak in.

⁸ Amah khantom henla, midang khat in ama nasep za ngah tahen.

⁹ Ama tate pa nei lo hi ta henla, a zi zong meigong numei hi tahen.

¹⁰ Ama tate vak kawikawi-in khut dawhin ngen henla, a kisia sa a teenna mun panun kihawl khia ta uh hen.

¹¹ Ama leibatna pa in a neih khempeuh man henla, khual mite in a om lai sunsunte sut tahen.

¹² Ama tungah kuamah migi kei henla, pa nei lo ama tate kuamah in hehpih kei tahen.

¹³ Ama suanlekhakte bei henla, khang khat sungin a vangliatna maimang tahen.

¹⁴ Topaʼ mai ah a pu a pateʼ mawhna kiciamteh henla, a nuʼ mawhna kimaisak kei tahen.

¹⁵ Topaʼ mai ah tua mawhnate omsak inla, leitung panin amah a kiphawkna bei tahen.

¹⁶ Bang hang hiam cih leh migitna lah ding ngaihsun lo a, a zawng a cimawhte le lungsim kitamzan mite a sih dongun a bawlsia hi.

¹⁷ Amah in mi samsiat nuam a sa hi. Ama tungah samsiatnate tungsak in. Amah in thupha pia nuam lo hi. Kuamah in amah thupha pia kei tahen.

¹⁸ Amah pen puansilh bangin samsiatna kingeina seh hi. Tua a samsiatnate ama pumpi sungah tui bangin a guhte sungah sathau bangin lutin kizel tahen.

¹⁹ Tua samsiatnate pen ama kituamna puan tawh kibang henla, nisimin amah a kigakna a kawnggak tawh kibang tahen.

²⁰ Hih bang teng pen keimah hong mawhsakteʼ tung, kei hong gensiateʼ tungah Topaʼ kiang pan a thaman hi tahen.

²¹ Ahih hangin Topa ka Pasian aw, na min na ngaihsutna tawh keima tangin hong pang inla, na itna kip hoih ahih manin kei hong hon khia in.

²² Bang hang hiam cih leh kei genthei-in ka cimawh a, ka lungsim tawng dongin na hong nasak hi.

²³ Nitak a niliim bangin kei ka bei a, kauphe bangin kei hong kising khia hi.

²⁴ An ngolhna hangin ka khukte zaw a, ka pumpi si le sa zong kiam gawp khinta hi.

²⁵ Amauteʼ nuihsatin kei ka om a, amaute in kei hong muh ciangun lusu ngeungeu uh hi.

²⁶ Topa ka Pasian aw, kei hong huh in. Nangma itna kip tawh kituakin kei hong hon in.

²⁷ Topa aw, hih pen nangma bawl, nangma khut in a sep ahihna amaute theisak in.

²⁸ Amaute in kei hong samsiat hangin nangmah in kei thupha nong pia ding hi. Ka langte zahhuaisak inla, na nasem pa keimah hong kipsak ta in.

²⁹ Kei hong mawhsakte in mindaina silh uh henla, puanza silh bangin amauʼ maizumna tawh kituamcip ta uh hen.

³⁰ Topa tungah ka lungdamna a ging pha-in ka ko dinga, mihonte lakah amah ka phat ding hi.

³¹ Bang hang hiam cih leh sih nading gimna a pia paʼ khut sung pan a hon khia dingin mi cimawh paʼ tak lamah amah hong ding hi.