Late 105 - Tedim Bible Revision 2017

Israel-te adingin Pasianʼ Sep Na Lamdangte

¹ Topa tungah lungdamna ko-in, ama min phat unla, ama sepnate khempeuh mite lakah kitheisak un.

² Ama tungah la sa un. Ama tungah phatna la sa unla, a lamdang a septe khempeuh gen ciat ta un.

³ Ama min siangtho hangin lungdam unla, Topa a zong mite lungdam tahen.

⁴ Topa le ama huh ding zon belin nei unla, a tawntungin ama maipha zong niloh un.

^5-6 No ama nasem, Abrahamʼ suanlekhak, Jakobʼ tate, ama teel mite aw, ama sep sa a lamdang nate, ama nalamdang lahte, a genkhiat a thukhennate phawk ciat ta un!

⁷ Amah pen Topa, eiteʼ Pasian hi a, ama thupiaknate leitung khempeuh in a zuih ding ahi hi.

^8-11 “Na luah dingin Kanaan gam kong pia ding hi,” ci-in Abraham tawh thuciam a bawl sa, Isaac tungah a thuciam sa, Jakob tungah thupiakna a kipsak, Israel tungah tawntung thuciamna, ama thupiak sa kammal, ama thuciamna pen khang tul khat dongin amah in phawk ngitnget hi.

¹² Amaute tawm mahmah in, bangmah gentham lo uh a, khualmi hi-in,

¹³ minam khat panin minam dang khat ah, gam khat pan gam khat ah a vak kawikawi laitakun,

¹⁴ amah in amaute kuamah nengniamsak lo hi. Amauteʼ hangin amah in kumpite thuhilhin,

¹⁵ “Ka sathau nilhte su kha kei un; ka kamsangte tungah siatna bawl kei un,” ci hi.

¹⁶ Amah in leitungah kialpi tungsakin, nek theih an khempeuh a siatsak ciangin,

¹⁷ amah in, Josef a kici, sila-a a kizuak mi khat, amauteʼ mai ah a sawl hi.

¹⁸ Ama khete pen kolte in nasak a, ama ngawng pen sikkol sungah kikoih hi.

¹⁹ Ama thugente a tun matengin Topa in amah ze-et hi.

²⁰ Amah a khah khia dingin kumpipa in mi paisak a, mihingte a ukpa in amah a khah khia hi.

^21-22 Josef in kumpipaʼ uliante ama ut bangin lamlakin, a upate pen pilna hilhsak a, ama inn sung topa ama neihsa khempeuh a ukpa-in a koih hi.

²³ Tua ciangin Egypt gamah Israel va pai a, Hamʼ gam sungah peemta-in Jakob va om hi.

²⁴ Topa in ama mite pungsak mahmah a, a galte sangin amaute hatsak zaw hi.

²⁵ Ama mite mudahin, ama nasemte siamna tawh a khem dingin amauteʼ lungsim amah in kiheisak hi.

²⁶ Amah in, ama nasem Moses le ama teel sa Aaron a sawl hi.

²⁷ Amaute in ama limte amauteʼ lakah nalamdangte Hamʼ gam sungah a bawl uh hi.

²⁸ Amah in khuamial sawl a, leitung khim a zingsak hi. Ahih hangin Egypt mite in ama thu a langpang uh hi.

²⁹ Amah in amauʼ tuite sisan suaksak a, a ngasate uh a sisak hi.

³⁰ Amauʼ leitang tung le a kumpipaʼ inn sung nangawn uiphukte tawh a kidim hi.

³¹ Amah kampau a, tho honpi le thokangte gam sung dimin hong om hi.

³² Amah in a guah dingun gialpi, amauʼ gam sung khempeuh a taangsak khuaphialep, amaute a pia hi.

³³ Amah in amauʼ leengguite le a theikungte uh vat tansak a, amauʼ gam sung sing khempeuh a kuaihtansak hi.

³⁴ Amah kampau a, kauphete le tangngolte, sim zawh lohin hong pai uh a,

³⁵ gam sunga kung khempeuh, amauʼ leitang panin a gah khempeuh a nektumsak mang hi.

³⁶ Amauʼ sung pan a piang masa Egypt tacil khempeuh a sat lum hi.

³⁷ Tua ciangin amah in ngun le kham tawh Israel-te paikhiatpih a, amaute a vekpi-in cidamin thahat kim uh hi.

³⁸ Amaute a paikhiat ciangun Egypt mite lungdam mahmah uh hi. Bang hang hiam cih leh amaute kihta uh hi.

³⁹ Amaute a liah dingin amah in meiipi kaisak a, zanin khua muh nadingin mei a omsak hi.

⁴⁰ Amaute in ngen a, vantung panin anlum tampi a pia hi.

⁴¹ Amah in suangpi hong a, tui a phul khia hi. Gun tui bangin sehnel gamah tui a luang hi.

⁴² Bang hang hiam cih leh a siangtho ama thuciamna le ama nasem Abraham a phawk hi.

⁴³ Tua ahih ciangin ama mite lungdamna tawh, ama teel mite lasakna tawh a paikhiatpih hi.

^44-45 Amaute in ama ngeina kipte zui-in, ama thukhamte a neih theih nadingun, amah in amaute tungah minam dangteʼ leitang pia a, midangteʼ nasepna gahte zong amaute a ngahsak hi. Topa phat un.