Late 101 - Tedim Bible Revision 2017

Kumpipaʼ Kamciamna

¹ Keima la pen thumanna le thutanna la ahi hi. Nang ka hong sak ding hi; Topa aw, kong sak ding hi.

² Paubaanna a om lo thu bek ka kin ding hi. Cik ciangin kei kiangah hong pai ding na hi hiam? Lungsim hoihna tawh ka inn sungah ka gamta ding hi.

³ A sia na peuhmah ka deih kei ding hi. Lam khial miteʼ nasepna ka mudah a, tuate tawh ka kisu kha kei ding hi.

⁴ Lungsim kawina ka deih het kei a, siatna, ngaihsutin zong ka nei kha kei ding hi.

⁵ A veengte a gen sia sim mite ka susia dinga, kiphatsakna, kihihsakna lungsim a nei mi ka thuak kei ding hi.

⁶ Leitungah a thuman mite kei tawh a om theih nadingin maipha ka pia dinga, paubaanna om loin a gamta mi in keima na hong sem ding hi.

⁷ Khemna a zang mi peuhmah keima inn ah teeng lo dinga, zuau thu a gen mi peuhmah keima omna ah om thei nawn lo ding hi.

⁸ Zingsang simin leitung a migilote khempeuh ka susia dinga, Topaʼ khuapi panin siatna bawlte khempeuh ka khen khia ding hi.