Late 100 - Tedim Bible Revision 2017

Lungdamna tawh Topaʼ Na Sem Un

¹ Gam khempeuh aw, Topaʼ tungah lungdamna aw gingsak un.

² Lungdamna tawh Topaʼ na sem un. Ama omna ah la sa kawmin hong pai un.

³ Topa, Pasian ahihna thei un. Eite hong bawlpa amah hi a, eite ama aʼ ihi hi. Eite ama mi ihi a, ama gankhahna sunga om a tuute ihi hi.

⁴ Lungdamkohna tawh ama kongpi ah lut unla, amah phatna tawh ama huang sungah tum un. Ama tungah lungdam ko unla, ama min phat un.

⁵ Bang hang hiam cih leh Topa hoih hi. Ama itna kipin kho tawntung a, ama thumanna a khangkhangin kip hi.