Kolose 2 - Tedim Bible Revision 2017

¹ Note a kipan Laodisia khua mite le kei a hong thei ngei nai lo mi khempeuhte ading nangawnin hahkat takin na ka sem hi.

² Note, lungsim hanna tawh kidimin, thu a man taktakin na theihna hangun lungkip takin omin, itna tawh pum khat na suah theih nading uh ka deihna ahi hi. Tua hileh Pasianʼ thusim ahi Khris mahmah na thei ding uh hi.

³ Khris pen Pasianʼ pilna le a thuthuk khempeuh a kitheih theih nading ahi hi.

⁴ Kuamah in note a hong khem zawh loh nadingin hih bang thu a hong gen ka hi hi.

⁵ Bang hang hiam cih leh note tawh ka hong om khawm loh hangin ka lungsimin note tawh ka hong om khawm a, Khris na upna uh hangin kip takin na om khawmna uh ka theih manin ka nuam mahmah hi.

⁶ Note hong honpa dingin Topa Khris na san sa uh ahih mah bangin amah tawh hoihtakin kipawlin nungta un.

⁷ Note tungah a hong kihilh sa bangin ama sungah zung thuk kha unla, ama deihna bangin nungta-in, na upna uh ah khauh semsemin, lungdam takin om un.

Khris sungah Kiptakin Nuntakna

⁸ Khris thu tawh a kituak lopi-in, tangthu tuanthu ahi a, huihlak a ukteʼ thu siksanin ahi zongin, bangmahin a kimang lo leitung pilna tawh miteʼ khem sa-in sila na suahkhak loh nadingun kingaihsun un.

⁹ Bang hang hiam cih leh mihing hong suahna sungah Khris in Pasianʼ pianzia khempeuh a kimtakin nei a,

¹⁰ Khris tawh na kipawlna hangun nuntakna kicing na nei uh hi. Huih lak a ukte le aana neite khempeuh tungah amah a lutangpi hi lai hi.

¹¹ Amah tawh na kipawlna uh hangin mihingte in pumpi vun a at uh bang hi loin, Khrisʼ vun-atna ahi mawhnopna lungsim tawh kipelhna a ngah khinta na hi uh hi.

¹² Note tui na kiphum uh ciangin Jesu tawh kiphum khawmin, misiteʼ lak panin Khris a thosak Pasianʼ vangliatna na up manun Khris mah tawh tuiphumna panin a thokhawm leuleu na hi uh hi.

¹³ A beisa hunah na mawhna uh hangin kha thu tawh kisai-in misi na hi uh a, Gentail mi na hih manun Thukham nei lote na hi uh hi. Ahi zongin Khris hangin Pasian in note hong hingsak a, i mawhna khempeuh hong maisak khinta hi.

¹⁴ Eite adingin a hoih lo, i mawhna a kiciaptehna khempeuh, hong phiatsak a, tuate khempeuh singlamteh tungah kilhcipin a beisak ta hi.

¹⁵ Amah in huihlak a ukte le vangliatna a nei khempeuh, singlamteh tungah zo gawp khin a, gal zote in a sal matte a kaih uh bangin mi khempeuh muhin a gualzawhna a lak hi.

Vantung thute Hanciam Un

¹⁶ Tua ahih manin an nek tui dawn, biakna pawite, Khadet pawi le Sabbath ni tawh kisai-in kuamah in ngeina zuih ding bawl kei un.

¹⁷ Hihte pen mai lamah a hong piang ding nateʼ lim hi lel a, ahi zongin tu-in a taktak ahi Khris hong om ta hi.

¹⁸ Maang a muhna hangun a thupi diakin kingaihsunin, a kilawm lo zah dongin kiniamkhiat nading le vantung mite biak ding a hong hanthawn miteʼ khem sa-in ta kei un. Tua bang mite pen amauʼ ngaihsut tawmna tawh a kihisak mawk hi a,

¹⁹ lutang ahi Khris a len nawn lo uh ahi hi. Lutang ahi Khrisʼ ukna tawh pumpi na khempeuh kizom dimdiam uh ahih manin pumpi in thahatna ngah a, Pasianʼ deih bangin a khangto hi.

²⁰ Khris tawh si khawm khin na hih manun huihlak a ukteʼ khut sung panin a suakta khin na hi uh hi. Tua hi napi-in, bang hangin hih leitung mite bangin gamta na hi uh hiam? Bang hangin ngeina a tuamtuamte,

²¹ “Lawng kei un, ciam kei un, su kei un,” cihte zuihin nei na hi uh hiam?

²² Hih nate pen i nek, i zat khit ciangin a maimang hi lel a, mihingteʼ bawl tawm thuhilhna le ngeina hi lel hi.

²³ Hih bang gamtatnate pen a tungtham in i et ciangin limtakin biaknopna lungsim a piangsak ding, kiniamkhiatna a piangsak ding, pumpi ki-uk zawhna a piangsak ding tawh kibang hi. Ahi zongin a taktakin hihte khat beek in pumpi ki-uk zawhna piangsak zo lo hi.