Kah la 4 - Tedim Bible Revision 2017

Jerusalemʼ Gim thuakna Bei ta

¹ Biakinnpi kisia ta a, suang kiciangte kongzing lakah a kithehthang hi. Khamtui tawh a kizut a tee daldalte mualmang khinzo ta hi.

² Kham bangin a manpha Jerusalem tangvalnote, leibeel bang lelin kibawl khinta hi.

³ Keivom nangawn in zong a note itin a nawi pia thei buang napi, ka mite in vasa-kalaoh bangin a tanote a su gawp hi.

⁴ Amaute in a ta ngeekte uh gilkial dangtakin sisak uh a, naupangnote an ngen dingin vaksak uh a, kuamah in an a pia kei hi.

⁵ An lim pen a ne ngeite kongzing lakah puksi uh a, nuamsa-in a khang khia mite in nin buakna lak thai-in an a zong uh hi.

⁶ Jerusalemʼ mawhna Sodom khuapiʼ mawhna sangin lian zaw ahih manin, thakhatin Pasianʼ khut sung pan kisiatna a ngah uh hi.

⁷ Pasianʼ mi dingin a kipia Nazir-te pen amauʼ pumpi uh a siasak lo, vuk bangin a ngo, a cidam, a thahat mite ahi uh hi.

⁸ Tu-in amaute kuama theih lohin kongzing lakah tuk pekpak uh a, a si dingin a mai uh dup khin a, a vun uh sing bangin keugaw-in, a guh guakin a om uh hi.

⁹ Nek ding nei loin puksih sangin gal sungah a site hampha zaw lai hi. Annek ding nei loin a site a puksi ahi uh hi.

¹⁰ Ka mite a cihmawh laitakun, itna a nei nupite nangawn in, a tanote uh go-in beel sungah a huan uh hi.

¹¹ Topa in a hehna khempeuh siit nawn loin hong bua khia a, meikuang tawh Jerusalem hong hal ahih manin a kaang tum hi.

¹² Namdangteʼ gam ukte le mi khempeuh Jerusalem a sim zo ding kuamah om lo ding hi, ci-in a up laitakun hih thu hong piang hi.

¹³ Kamsangte le siampite in mawhna a bawl manun mi siangtho midikteʼ sihna a hong piang ahi hi.

¹⁴ Amaute mittaw bangin kongzing lakah vak uh a, kuama lawn ngam loh dingin silenai tawh a dim uh hi.

¹⁵ Mite in, “Pai khia un, mi ninte aw, hong lawng kha kei un,” ci-in a kiko uh hi. Tua bangin minam khat khit nam khat kiangah pai kawikawi uh a, ahih hangin kuamah in amaute a ngai kei uh hi.

¹⁶ Topa in amaute a zat nopna om nawn lo ahih manin amaute a thehthang hi. Amah in i makaite le i siampite a awlmawh nawn kei hi.

¹⁷ Huhna a ngenin ka khua dakdak uh a, khuadak zo nawn lo zah dongin ka om uh hangin bangmah ka ngah kei uh hi. A hong pia zo lo ding minamte tungah huhna ka ngenngen kha uh hi.

¹⁸ Galte in hong vil sim uh ahih manin ka vak khia ngam kei uh hi. Ka hun uh a bei ta hi a, a beina hun a tung zo ahi hi.

¹⁹ Mu ak bawh sangin a manlang zaw-in amaute in a hong delh uh hi. Amaute in mual tung panin hong delh suk uh a, theih kholh lohin a hong man khin uh hi.

²⁰ Amaute in galteʼ khut sung panin a hong huh zo dingin ka up uh, Pasianʼ teel a muanhuai kumpi a hong matsak uh hi.

²¹ Edom le Uz mite aw, tu-in nuinui mai unla, ahih theih lai teng kipak un. Bang hang hiam cih leh siatna hun hong tung dinga, a hong tun ciangin na guaktangun omin, maizumin na om ding uh hi.

²² Jerusalem in a mawhna thaman a sang khinzo ta ahi hi. Ka thuak ding uh a nasia penpen teng ka thuak khinzo ta uh hi. Ahi zongin Edom aw, Topa in nang gim hong pia dinga, na mawhna khempeuh a hong pholak ding hi.