Kah la 3 - Tedim Bible Revision 2017

Pasianʼ Hehpihna tawh Suahtak Ding Lametna

¹ Pasian in gim hong piakna zia a thuak khin pa kei ka hi hi.

² Amah in a thuk mahmah khuamial sungah a hong hawl khia hi.

³ Hong hehpih het loin a khut tawh a hong tum niloh hi.

⁴ Amah in a liam a bai guh kitan sa-in a hong nusia hi.

⁵ Amah in lunggimna le gentheihna thonginn sungah a hong khumcip hi.

⁶ Amah in sihna khuamial uih sungah a teeng dingin aana tawh thu a hong pia hi.

⁷ Amah in kol hong bulh a, taikhiat zawh het lohna kulhpi sungah hong koih hi.

⁸ Hong huh un, ci-in ka kiko hangin ka kikona aw a pua lamah a kiza zo kei hi.

⁹ Hoi dangdang ka hih manin suang kulhpite ka kantan zo kei hi.

¹⁰ Amah in vompi bangin kei hong buk sim a, humpinelkai bangin a hong bawh hi.

¹¹ Amah in lam pam ah hong delh khia a, a hong balnen khit ciangin a hong nusia hi.

¹² Amah in a thalpi keek a, thal tawh kap dingin a hong ngim hi.

¹³ Amah in a thaltang a thuktum theithei dingin a hong kap hi.

¹⁴ Mite in sun tawntung hong nuihsan niloh uh a, leitung bup in ciamnuihna-in a hong nei uh hi.

¹⁵ Amah in ka ut lohpipi-in tui kha hong dawnsak a, ka duh lohpipi-in an kha a hong nesak hi.

¹⁶ Amah in ka maitang lei ah hong hiat a, suang tungah ka ha a hong tah tansak hi.

¹⁷ Lungnopna, cidamna, kipahna cihte bang ahi hiam, cih mel ka thei nawn kei hi.

¹⁸ Sau veipi ka nungta nawn kei ding hi. Topaʼ tung pan ka lametna teng a bei ta hi.

¹⁹ Gimna ka thuaknate le inn le lo nei loin ka omna pen gu-kha bang hi a,

²⁰ tua pen a tawntungin lungkiatna ahi hi.

²¹ Ahi zongin ka phawk giugiau thu khat in lametna khat hong nei theisak hi.

²² A bei thei lo Topaʼ hong itna le a hehpihna a kizom paisuak hi a,

²³ zing nisuak bangin thaksuak tawntung a, ni a hong suah pelmawh mah tawh a kibang ahi hi.

²⁴ Topa longal neih dang nei lo ka hih manin ama tung bekah lametna ka nei hi.

²⁵ Amah a muangte adingin Topa a hoih hi.

²⁶ Tua ahih ciangin thuak zawhna tawh ngak kenkan zo lehang a hoih pen ahi hi. A hong hotkhiat ding amah ngak ni.

²⁷ Na khangno lai-in thuak zawh hat ding kisin leteh hoih pen hi.

²⁸ Gimna i thuak ciangin dam takin tu hithiatin i thuak zo ding hi.

²⁹ Lametna ding om thei lai ahih manin phunphun huai dek lo hi.

³⁰ Guallelin bawlsiatna thuak ta lehang tua banga om lel ding ahi hi.

³¹ Topa in hehpihna nei ahih manin hong nial paisuak lo ding hi.

³² Dahna hong thuaksak thei dinga, ahih hangin eite a hong itna muanhuai-in kip tawntung hi.

³³ Dahna le gimna a hong thuaksak ciangin amah lungdam pah sam lo hi.

³⁴ Topa in thong sungah i thuak i lunggimnate a hong thei hi.

³⁵ Mite in Pasian thusim loin, i hamphatnate hong paih khiatsakin,

³⁶ zum thukhenna ah a manin thu a kikhen loh ciangin, amah in a hong thei veve hi.

³⁷ Topaʼ deihna bang bekin na khempeuh a piang ahi hi.

³⁸ Ama thupiakna bangin a sia ahi a, a pha ahi zongin a piang ahi hi.

³⁹ I mawhna hangin gim i thuak ciangin bang hangin phunphun ding ihi hiam?

⁴⁰ I gamtatna sate limtakin ki-enphakikin Topaʼ lamah kiheikik ni.

⁴¹ Vantung a om Pasian tungah i lungsim pia-in thu ngen ni.

⁴² “Topa aw, nang tungah kong khial uh a, hong leh do kha ka hih manun ka mawhna uh na hong maisak nai kei hi.

⁴³ “Kote nong nung delh a, na hong that khinzo hi. Heh na hih manin na hehpihna a kiseelcip hi.

⁴⁴ Na hehna, meiipi zahin sah mahmah ahih manin ka thungetna uh na kiang a hong tung zo kei hi.

⁴⁵ Hih leitungah kote a kihhuai nahteh muat bangin na hong bawl hi.

⁴⁶ “Ka galte khempeuh un hong simmawhin a hong zahpih uh hi.

⁴⁷ Siatna bekbek tawh kidimin, kihtakna le launa tawh ka nungta uh hi.

⁴⁸ Ka mite a kisiat manin ka khitui hawktui luang a bang hi.

⁴⁹ “Ka khitui kang thei loin luitui bangin luang tawntung a,

⁵⁰ vantung panin Topa in hong en sukin a hong muh ciangin,

⁵¹ ka khuapi kisiatna in ka lungsim hong kitamsak hi.

⁵² “A thu om lopi-in ka galte in hong mudah uh a, vasa siah bangin thang a hong siah uh hi.

⁵³ Leihawm thukpi kawt sungah hong hing khiat uh a, suangtumpi tawh a hong sincip uh hi.

⁵⁴ Tui in hong tuumcip gawp ahih manin a si khinta-in ka kingaihsun hi.

⁵⁵ “Topa aw, leihawm thukpi taw panin ka hong kiko to hi.

⁵⁶ Kong thumna hong ngai in, ci-in ka hong thum ciangin na hong za hi.

⁵⁷ Na hong dawng a, a lau lo dingin thu nong pia hi.

⁵⁸ “Topa aw, nangmah in na hong huh a, na hong nungtasak hi.

⁵⁹ A mawkna-in kei hong kimawhsaknate thei khin na hih ciangin thu hong khen inla, kei hong khah khia in.

⁶⁰ Ka galteʼ hong muhdahna le a vaihawm simna thute uh na thei khinzo hi.

⁶¹ “Topa aw, amauʼ hong simmawhnate na thei khinzo a, a ngimnate khempeuh uh zong na thei zo hi.

⁶² Sun tawntung keimah bawlsiat ding bekbek kikumin a vaihawm tawntung uh hi.

⁶³ Zingsang a kipan nitak dong a hong zahpih uh hi.

⁶⁴ “Topa aw, amauʼ gamtatna bangin thukkik in.

⁶⁵ Amaute phuisam inla, a cimawh dingin hawl khia in.

⁶⁶ Amaute delh kek inla, leitung panin nuai mang gawp in,” ci ni.