Joshua 5 - Tedim Bible Revision 2017

Gilgal ah Vun-atna le Paisan Pawi

¹ Nitumna lam Jordan gal khat a om Amor miteʼ kumpite khempeuh le tuipi gei-a om Kanaan miteʼ kumpi khempeuh in, Israel mite in a kantan khit mateng amaute adingin Jordan tuite Topa in a kansakna thu a zak uh ciangin lungmang uh a, Israel miteʼ hangin a lungsim uh a bei hi.

² Tua hun laitakin Topa in Joshua kiangah, “Meisuang tem bawl inla, Israel mite a nih veina vun atkik in,” a ci hi.

³ Tua ahih ciangin Joshua in meisuang tem bawl a, Gibeath-haaraloth munah Israel mite a vun a at hi.

⁴ Joshua in amaute vun a atna a thu in: Egypt gam panin hong paikhia pasal galhang mite khempeuh, Egypt panin hong paikhiat khit uh ciangin lamkal sehnel gamah si khin uh hi.

⁵ Hong paikhia mite khempeuh vun a ki-at khit hangin Egypt panin hong paikhiat khit uh sehnel gam lamkal a suak mite khempeuh a vun uh ki-at nai lo hi.

⁶ Bang hang hiam cih leh amaute in Topaʼ thu a ngaih lohna hangun Egypt panin a hong paikhia minam bup, galhang mite a sih khit dong kum sawm li sung sehnel gamah Israel mite lam pai uh hi. Topa in amauʼ tungah a piak dingin a pu a pate tungah a ciam sa bawngnawi le khuaizu tui bangin a luanna leitang a muhsak loh nading thu amaute tungah Topa kiciam hi.

⁷ Tua ahih ciangin Joshua in vun a at mite pen, amauteʼ tangin amah in a piansak amauʼ tate ahi hi. Bang hang hiam cih leh lampi ah amaute a vun ki-at nai lo ahih manin vun at nai loh ahi uh hi.

⁸ Minam bup vun ki-atna a man khit ciangin giahphual amauʼ mun ciatah a dam mateng a om uh hi.

⁹ Tua ciangin Topa in Joshua kiangah, “Tu ni-in noteʼ tung panin Egypt gamah sal suakin na min siatna uh ka zial khia hi,” a ci hi. Tua ahih ciangin tua mun pen tu ni dongin Gilgal kici hi.

¹⁰ Israel mite Gilgal-a giahphual ah a om sungun tua kha a ni sawm le li ni nitakin Jerikho zanglei ah Paisan Pawi a bawl uh hi.

¹¹ Paisan Pawi khit a zing ciang ni teekteekin amaute in tua gam a piang silngo sawh loh moh le ankan a ne uh hi.

¹² Tua gam a piang a nek ni uh a zing ciangin manna a bei ta hi. Israel mite in manna nei nawn lo uh a, ahih hangin tua kumin Kanaan leitang a piangte a ne uh hi.

Joshua le a Kidok sa Namsau Tawipa

¹³ Jerikho khua kiangah Joshua a tun ciangin a khuadak toh leh, a khut sungah namsau dawh sa tawh mi khat a mai ah na ding hi. Ama kiangah Joshua pai-in, “Koʼ pawl na hi hiam, ahih kei leh ka langteʼ pawl na hi hiam?” a ci hi.

¹⁴ Amah in, “Hi lo hi; Topaʼ galkapte a ukpa-in tu-in kong pai hi,” a ci hi. Joshua zong bok sukin bia-in ama kiangah, “Ka topa in a nasem pa bang hong sawl nuam ahi hiam?” a ci hi.

¹⁵ Tua ciangin Topaʼ galkapte a ukpa in Joshua kiangah, “Na khe panin na khedapte suah in. Bang hang hiam cih leh na dinna mun a siangtho leitang ahi hi,” a ci hi. Tua bangmahin Joshua a gamta hi.