Joshua 2 - Tedim Bible Revision 2017

Jerikho ah Thukante Kisawl

¹ Tua ciangin Nunʼ tapa Joshua in Shittim panin thukanin mi nih sawlsim a, “Pai-in gam va en unla, a diakdiakin Jerikho khua hong en un,” a ci hi. Amaute pai uh a, Rahab min nei numei paktat nuʼ inn ah tungin giak uh hi.

² Jerikho kumpipa tungah, “Gam sung a en dingin Israel mi pawl khat tu nitakin hih lai ah hong tung zo hi,” ci-in kigen hi.

³ Tua ciangin Jerikho kumpipa in Rahab kiangah mi sawlin, “Na inn sunga hong tum, na kiang a hong tung mite hong paikhiatpih in; bang hang hiam cih leh gam khempeuh a en dingin amaute hong pai uh hi,” a ci hi.

⁴ Ahih hangin Rahab in tua mi nihte la-in na seel khin hi. Tua ahih ciangin amah in, “Hi mah hi, ka kiangah mi hong pai uh hi. Ahih hangin amaute koi pan hong pai uh hiam, cih ka thei kei hi.

⁵ Kulh kongpi a kikhak ding khuamial ciangin tua mite paikhia uh a, koi ah pai uh hiam, cih ka thei kei hi. Manlangin amaute delh le-uhcin na pha kha ding uh hi,” a ci hi.

⁶ Ahih hangin amah in innkhum zang ah tua mite paipih to-in innkhum zang ah a koih ngei bangin a koih sa anthul kungte lakah amaute seel khin hi.

⁷ Tua ahih ciangin mite in Jordan lamah ngahmun dong delh uh a, a delhte a paikhiat phetin kulh kongpi kikhak hi.

⁸ Amaute a lup ma-in innkhum zanga amaute kiangah Rahab pai to-in

⁹ tua mite kiangah, “Topa in noteʼ tungah hih leitang hong piak khitna ka thei a, note ka hong kihta mahmah uh hi. Hih gam sunga a teeng mi khempeuh noteʼ hangin lunggim uh hi.

¹⁰ Bang hang hiam cih leh Egypt panin nong paikhiat lai-un Topa in noteʼ mai ah San Tuipi a kansakna le Jordan gal khat a om na suksiat mang uh Amor miteʼ kumpi nihte ahi Sihon le Og tungah na bawlna uh ka za khin uh hi.

¹¹ Tua thu ka zak phetun ka lungsim uh bei a, noteʼ hangin miteʼ lungsimah hanna bei hi; bang hang hiam cih leh Topa na Pasian uh, tunga om vantung le nuai-a om leitungah Pasian ahi hi.

¹² Tua ahih ciangin tu-in note tungah kong dik gamtat bangin note zong ko innkuan ah nong dik gamtat nading uh Topaʼ min tawh kei tungah hong kiciam unla, a man taktak lim khat kei hong pia un.

¹³ Ka nu, ka pa, ka sanggam nute, ka sanggampate le amaute tawh a kizomte khempeuh hong hon unla, sihna panin kote hong suaktasak un,” a ci hi.

¹⁴ Mite in ama tungah, “Nangʼ tangin kote ka si ngam uh hi. Hih koʼ thu na genkhiat kei nakleh, Topa in kote tungah hih leitang hong piak ciangin nang tungah dikna le thumanna tawh kong gamta ding uh hi,” a ci uh hi.

¹⁵ Tua ciangin amah in tawlet panin khau khat tawh amaute khai suk hi. Bang hang hiam cih leh khuapi kulh sung lam pangah ama inn kilam a, khuapi kulh sungah amah teeng hi.

¹⁶ Amah in amaute kiangah, “Mual tungah pai un. Hong delhte tawh na kituak kha ding uh hi. Hong delhte hong ciahkik mateng ni thum sung tua lai ah bu un. Tua khit ciangin na pai nading uh ah na pai thei ding uh hi,” a ci hi.

¹⁷ Mite in ama kiangah, “Kote nong kiciamsak thuciamna thu tawh kisai-in ka paubaang kei ding uh hi.

¹⁸ En in, hih leitang ah kong pai uh ciangin kote nong khai sukna hih tawlet ah hih khauhual san na khih ding hi. Na inn sungah na nu le na pa, na sanggamte le na paʼ innkuanpihte khempeuh na khawm ding hi.

¹⁹ Mi khatpeuh na inn sung panin kongzing lampi ah a paikhiat le ama sihna pen ama khialhna hang hi dinga, kote ka siang ding uh hi. Ahih hangin inn sungah nang tawh a om mi khatpeuh a kisukkhak leh, ama sihna pen koteʼ khialhna hi ding hi.

²⁰ Ahih hangin hih ko thute na genkhiat leh, kote nong kiciamsak thuciamna tawh kisai-in kote ka siang ding uh hi,” a ci uh hi.

²¹ Tua ciangin amah in, “Na thugen bangun hi tahen,” a ci hi. Tua ciangin amah in amaute sawl khia a, amaute paikhia uh hi. Amah in a khauhual san a tawlet ah a khih hi.

²² Amaute pai khia-in mual tungah pai uh a, a delhte a ciahkik mateng ni thum sung om uh hi. Bang hang hiam cih leh a delhte in lamdung khempeuh zongin bangmah mu lo uh hi.

²³ Tua ciangin mual tung panin mi nihte pai sukkik uh a, gal kahin Nunʼ tapa Joshua kiangah tungin amauʼ tunga thupiang khempeuh a gen uh hi.

²⁴ Amaute in Joshua kiangah, “Topa in leitang khempeuh eiteʼ khut sungah hong pia taktak hi. Tua tham loin tua gam a teeng mi khempeuh eiteʼ hangin lungmang uh hi,” a ci uh hi.