Joshua 18 - Tedim Bible Revision 2017

Shiloh ah Leitang Hawmna

¹ Tua ciangin Israel mihon buppi Shiloh ah kikhawmin tua lai ah kikhopna buk lam uh a, amauteʼ mai ah gam zawh sa-in om hi.

² Israel mite lakah gamh a kipia nai lo minam sagih om lai hi.

³ Tua ahih ciangin Joshua in Israel mite kiangah, “Topa, na pu na pate uh Pasian in note hong piak sa leitang ah pai-in na luah ding uh bang tanvei zekai lai ding na hi uh hiam?

⁴ Minam khat panin mi thum ciat hong pia unla, amaute va kuan khia-in vaksuk vakto-in, amauteʼ luah dinga ngaihsutna tawh a leitang om ziate hong gelhin, tua ciangin kei kiangah hong ciah dingun amaute ka sawl ding hi.

⁵ Amaute in seh sagihin khenin, leitaw lam ama gam mahah Judah omsuakin, Josefʼ innkuante leilu lam amauʼ gamah om ding hi.

⁶ Note in leitang khen sagihin hong ciamteh unla, na ciaptehna uh hih mun kei kiangah nong paipih ding uh hi. Tua ciangin keimah in Topa i Pasianʼ mai ah note ading ai ka san ding hi.

⁷ Levi mite in note lakah tanh nei lo hi. Bang hang hiam cih leh Topaʼ siampi nasepna pen amauʼ luah ahi hi. Gad, Reuben le Manasseh minam a langte in Topaʼ nasem Moses in amaute tungah a piak ahi Jordan Nisuahna lam gal khat ah amauʼ gamh ngah khinzo uh hi,” a ci hi.

⁸ Tua ahih ciangin mite a kuan uh hi. Leitang a ciaptehna a gelh nadingun Joshua in a pai mite thu pia a, “Vaksuk vakto-in leitang ciaptehna hong gelh unla, kei kiangah hong paikik un. Tua ciangin Shiloh mun Topaʼ mai ah note adingin ai ka san ding hi,” a ci hi.

⁹ Tua ciangin mite kuanin gam sungah pai suk pai to-in khen sagih suahin tua gam a khuakhua-in a ciaptehna uh laibu khat sungah khum uh a, Shiloh giahphual a Joshua kiangah amaute hong pai uh hi.

¹⁰ Joshua in amaute adingin Topaʼ mai Shiloh ah ai sansak hi. Tua ciangin Joshua in amauʼ tanh ding ciat Israel-te tungah leitang a pia hi.

Benjamin a Kipia Gam

¹¹ A behbeh tawh kizui-in Benjamin minamte ading aisan hun hong tunga, amauʼ tungah a kipia gam pen Judah minam le Josef minamte kikalah hong kia hi.

¹² Leilu lamah amauʼ gamgi pen Jordan panin kipan a, Jerikho leilu lam liangko ah pai to-in, tua panin mual tung gam nawkin nitumna lamah pai a, Bethaven sehnel gamah a tawp hi.

¹³ Tua lai panin gamgi in Luz lam manawhin leitaw lam nawtin Luz (Bethel a kici) liangko ah pai a, Beth-horon Nuainung leitaw lam a om mual tunga Ataroth-addar khua ah pai suk hi.

¹⁴ Tua ciangin mun dang manawhin gamgi pai a, Beth-horon gal khat, leitaw lam a om mual panin nitumna lam pang leitaw lamah kihei a, Judah minamte aʼ ahi Kiriath-baal (Kiriath-jearim a cihna) ah a tawp hi. Hih in a nitumna lam pang piangsak hi.

¹⁵ Tua ciangin Kiriath-jearim mong panin leitaw lam pang kipan a, Efron lam, Neftoah Luite ah gamgi pai hi.

¹⁶ Tua ciangin Refaim kuam leilu lam mong a om, Hinnomʼ tapaʼ kuam a kimuhna mual a gamgi ah pai hi. Tua ciangin Jebus miteʼ gam liangko leitaw lam, Hinnom Kuam ah pai sukin, Enrogel ah pai suk suak hi.

¹⁷ Tua ciangin leilu lam manawhin kawi-in, En-shemesh ah paisuak a, tua lai panin Adummim kah tohna gal khat, Geliloth ah pai a, Reubenʼ tapa Bohanʼ Suangpi ah pai suk hi.

¹⁸ Tua ciangin Beth-arabah gam liangko leilu lamah pai suakin Arabah ah pai suk hi.

¹⁹ Tua ciangin Beth-hoglah gam liangko leilu lamah gamgi paisuak a, Jordan mong leitaw lam, Ci Tuipi dawk leilu lamah a tawp hi. Hih pen leitaw lam gamgi hi a,

²⁰ Jordan in nisuahna lam pang a gamgi piangsak hi. Hih pen a beh zui-in a kimkot ah a gamgi a gamgi-in Benjamin minamʼ luah ahi hi.

²¹ Tu-in amauʼ beh tawh kizui-in Benjamin minamteʼ khuapite in Jerikho, Beth-hoglah, Emek-keziz,

²² Beth-arabah, Zemaraim, Bethel,

²³ Avvim, Parah, Ofrah,

²⁴ Khefar-ammoni, Ofni, Geba - khuapi sawm le nih, a khuaneute tawh ahi hi.

²⁵ Tua ciangin Gibeon, Ramah, Beeroth,

²⁶ Mizpeh, Khefirah, Mozah,

²⁷ Rekem, Irpeel, Taralah,

²⁸ Zela, Haelef, Jebus (Jerusalem a cihna), Gibeah le Kiriath-jearim - khuapi sawm le li, a khuaneute tawh zong ahi hi. Hihte pen a beh tawh kizui-in Benjamin minamteʼ luah ahi hi.