Joshua 16 - Tedim Bible Revision 2017

Efraim le Manasseh a Kipia Gam

¹ Josefʼ suanlekhakteʼ tanh gamgi pen Jerikho luiteʼ nisuahna lam, Jerikho kiang Jordan panin sehnel gamah pai a, Jerikho panin mual tung gamte tawnin Bethel ah pai to hi.

² Tua ciangin Bethel panin Luz ah pai-in, Arkhi mite gam Ataroth nawk hi.

³ Tua ciangin nitumna lam Jaflet miteʼ gam lam Beth-horon a niam lam gam ciang dongah pai suk hi. Tua ciangin Gezer ah pai-in tuipi ah tawp hi.

⁴ Josefʼ suan Manasseh le Efraim mite in amauʼ gamhluah dingin hih gamte ngah uh hi.

⁵ Amauʼ behbehin Efraim miteʼ gam pen a nuai-a bang ahi hi: Nisuahna lamah amauʼ gamgi pen Ataroth-addar pan Beth-horon tungnung ciang ahi hi.

⁶ Tua panin tuipi ciangah a gamgi pai a, leilu lamah Mikmethath ahi hi. Tua ciangin nisuahna lam a gamgi Taanathshiloh lamah kual pai-in, nisuahna lam galah pai-in Janoah a tung hi.

⁷ Janoah panin Ataroth le Naarah ah pai suk a, Jerikho banin Jordan ah tawp hi.

⁸ Tappuah panin nitumna lam Kanah lui ah gamgi pai-in tuipi ah tawp hi. Hih pen amauʼ behbehin Efraim minamteʼ gamhluah hi a,

⁹ Manasseh miteʼ gamhluah sung panin Efraim mite adingin a kikhen khia khuapite, a khuaneute tawh ahi hi.

¹⁰ Ahi zongin amaute in Gezer sunga teeng Kanaan mite hawl khia lo uh hi. Tua ahih ciangin tu ni dongin Kanaan mite pen Efraim mite lakah teeng a, ahih hangin aana nasep a sem dingin sal a suak uh hi.