Joshua 15 - Tedim Bible Revision 2017

Judah a Kipia Gam

¹ Amauʼ beh tawh kizui-in Judah miteʼ ngah pen leitaw lamah Edom gamgi ciang hi a, leitaw lam a gamla penna munah Zin gam ciang ban hi.

² Leitaw lam a gamgi pen Ci Tuipi mong, leitaw lam a sun tuidawk pan kipan hi.

³ Leitaw lam Akrabbim kah tohna ah pai khia-in, Zin dong ban a, Kadesh-barnea leitaw lamah Hezron dung tawnin Addar ciang dong pai to-in Karka lamah kihei a,

⁴ Azmon ciang dong pai-in Egypt lui ah suak khia a, tuipi ah a mong bei hi. Hih pen amauʼ leitaw lam gamgi hi ding hi.

⁵ Tua ciangin nisuahna lam gamgi pen Jordan tunna ciang dong Ci Tuipi ahi hi. Leilu lam pang gamgi pen Jordan tunna tuipi dawk panin kipan hi.

⁶ Beth-hoglah lamah a gamgi pai to a, Betharabah leilu lam pangah paisuak hi. Tua ciangin Reuben tapa Bohanʼ Suangpi dongah a gamgi pai to-in,

⁷ Akhor Kuam panin Debir ah pai to a, leilu lam manawhin, tua kuam leitaw lam pangah a om, Adummim kah tohna gal khat ah a om Gilgal lamah kihei hi. Tua ciangin En-shemesh lui dung ah gamgi pai-in Enrogel ah tawp hi.

⁸ Tua ciangin Jebus (Jerusalem a cihna) liangko leitaw lam Hinnomʼ tapaʼ kuamah gamgi pai to-in, Refaim kuam leilu lam mong, nitumna lam Hinnom Kuam gal khat ah a kikhung mual dawnah gamgi pai to hi.

⁹ Tua ciangin mual dawn panin Neftoah lui ah gamgi kikhung a, tua panin Efron Mual khuapite ah pai a, tua ciangin Baalah (Kiriath-jearim a cihna) lamah gamgi kawi kual hi.

¹⁰ Tua ciangin Baalah nitumna lam Seir Mual ah gamgi kual a, tua panin pai suakin Jearim Mual (Khesalon a cihna) liangko leilu lamah pai-in, Beth-shemesh ah pai suk a, Timnah kiangah paisuak hi.

¹¹ Ekron leilu lam mual liangko ah a gamgi paikhia a, tua ciangin Shikkeron ah gamgi kawi kualin, Baalah Mual ah paisuak a, Jabneel ah leng khia-in tuipi ah a gamgi tawp hi.

¹² Tua ciangin nitumna gamgi pen Tuipi Lian dung teng ahi hi. Hih pen amauʼ beh tawh kizui-in Judah miteʼ kiimah a gamgi ahi hi.

Kaleb in Hebron le Debir Zo

¹³ Topa in Joshua tungah a thupiak bangin Jefunneh tapa Kaleb tungah amah in Judah mite lakah tanh khat Kiriath-arba, Hebron a cihna, (Arba pen Anakʼ pa hi) pia hi.

¹⁴ Tua lai panin Kaleb in Anakʼ tapa thumte Sheshai, Ahiman le Talmai, Anakʼ suanlekhakte a hawl khia hi.

¹⁵ Tua lai panin Debir sunga a teeng mite a sim dingin amah kuan to hi. Debir pen a nidangin Kiriath-sefer kici hi.

¹⁶ Kaleb in, “Kiriath-sefer vat gawpin a la zo mi tungah ka tanu Aksah a zi dingin ka pia ding hi,” a ci hi.

¹⁷ Tua ciangin Kalebʼ sanggampa Kenazʼ tapa Othniel in la a, amah in a zi dingin a tanu Aksah a pia hi.

¹⁸ Tua nu ama kiangah a pai ding ciangin ama paʼ tung panin lo khat a nget ding hah gen hi. A la tung panin tua nu a kum ciangin Kaleb in tua nu kiangah, “Bang ut na hi hiam?” a ci hi.

¹⁹ Amah in, “Letsong khat hong pia in. Negeb gamah kei hong koih na hih buangin ciktui khukte zong hong pia in,” a ci hi. Tua ciangin Kaleb in tua nu tungah ciktui tungnungte le ciktui nuainungte a pia hi.

Judah Khuapite

²⁰ Hihte pen amauʼ beh tawh kizui-in Judah minamteʼ gamhluah ahi hi.

²¹ Leitaw lam mongciik, Edom gamgi lamah Judah minamteʼ neih khuapite: Kabzeel, Eder, Jagur,

²² Kinah, Dimonah, Adadah,

²³ Kadesh, Hazor, Ithnan,

²⁴ Zif, Telem, Bealoth,

²⁵ Hazor-hadattah, Kerioth-hezron (Hazor a cihna),

²⁶ Amam, Shema, Moladah,

²⁷ Hazar-gaddah, Heshmon, Beth-pelet,

²⁸ Hazarshual, Beer-sheba, Biziothiah,

²⁹ Baalah, Iim, Ezem,

³⁰ Eltolad, Khesil, Hormah,

³¹ Ziklag, Madmannah, Sansannah,

³² Lebaoth, Shilhim, Ain le Rimmon: a vekpi-in khuapi sawm nih le kua, a khuaneute tawh ahi hi.

³³ Tua ciangin lei niamna lamah Eshtaol, Zorah, Ashnah,

³⁴ Zanoah, Engannim, Tappuah, Enam,

³⁵ Jarmuth, Adullam, Sokoh, Azekah,

³⁶ Shaaraim, Adithaim, Gederah le Gederothaim: khuapi sawm le li, a khuaneute tawh ahi hi.

³⁷ Tua banah Zenan, Hadashah, Migdalgad,

³⁸ Dilean, Mizpeh, Joktheel,

³⁹ Lakhish, Bozkath, Eglon,

⁴⁰ Kabbon, Lahmam, Khitlish,

⁴¹ Gederoth, Beth-dagon, Naamah le Makkedah: khuapi sawm le guk, a khuaneute tawh zong ahi hi.

⁴² Tua ciangin Libnah, Ether, Ashan,

⁴³ Iftah, Ashnah, Nezib,

⁴⁴ Keilah, Akzib le Mareshah: khuapi kua, a khuaneute tawh ahi hi.

⁴⁵ Ekron a khuapite le a khuaneute tawh ahi hi.

⁴⁶ Ekron panin tuipi dong, Ashdod lam pang a omte khempeuh a khuaneute tawh ahi hi.

⁴⁷ Ashdod, a khuapite le a khuaneute tawh ahi hi. Gaza, a khuapite le a khuaneute tawh ahi hi. Egypt lui le tuipi lian a gei ciang dong tawh ahi hi.

⁴⁸ Tua ciangin mual tung gamah Shamir, Jattir, Sokoh,

⁴⁹ Dannah, Kiriath-sannah (Debir a cihna),

⁵⁰ Anab, Eshtemoh, Anim,

⁵¹ Goshen, Holon le Giloh: khuapi sawm le khat, a khuaneute tawh ahi hi.

⁵² Arab, Dumah, Eshan,

⁵³ Janim, Beth-tappuah, Afekah,

⁵⁴ Humtah, Kiriath-arba (Hebron a cihna) le Zior: khuapi kua, a khuaneute tawh ahi hi.

⁵⁵ Maon, Karmel, Zif, Juttah,

⁵⁶ Jezreel, Jokdeam, Zanoah,

⁵⁷ Kain, Gibeah le Timnah: khuapi sawm, a khuaneute tawh ahi hi.

⁵⁸ Halhul, Bethzur, Gedor,

⁵⁹ Maarath, Beth-anoth le Eltekon: khuapi guk, a khuaneute tawh ahi hi.

⁶⁰ Kiriath-baal (Kiriath-jearim a cihna) le Rabbah: khuapi nih, a khuaneute tawh ahi hi.

⁶¹ Sehnel gamah Betharabah, Middin, Sekakah,

⁶² Nibshan, Ci Khuapi le Engedi: khuapi guk, a khuaneute tawh ahi hi.

⁶³ Ahih hangin Judah mite in Jerusalem-a a teeng Jebus mite hawl khia zo lo uh hi. Tua ahih ciangin tu ni dongin Jebus mite pen Judah mite tawh Jerusalem ah a teeng khawm uh hi.